Seventh Pay Commission : सातव्या वेतन आयोगाचा हप्ता रोखीने अदा करावा; म्युनिसिपल कर्मचारी सेनेचा आंदोलनाचा इशारा

Seventh Pay Commission : महापालिकेच्या कर्मचाऱ्यांना सातव्या वेतन आयोगाच्या फरकाचा चौथा व पाचवा हप्ता रोखीने अदा करावा, अशी मागणी म्युनिसिपल कर्मचारी-कामगार सेनेने केली असून फरक अदा न केल्यास आंदोलनाचा इशारा दिला आहे. संघटनेचे अध्यक्ष सुधाकर बडगुजर यांनी आयुक्तांना याबाबत निवेदन दिले. महापालिका आस्थापनेवरील अधिकारी आणि कर्मचाऱ्यांना १ जानेवारी २०१६ ते ३१ मार्च २०२१ या कालावधीचा फरक समान पाच हप्त्यात रोखीने अदा करण्याबाबत निर्णय झाला आहे.

महापालिका आस्थापनेवरील अधिकारी व कर्मचाऱ्यांना मात्र वेतन फरकाचा चौथा व पाचवा हप्ता अद्याप अदा झालेला नाही. शासन निर्णय विचारात घेऊन शासनाच्या धर्तीवर मनपा आस्थापनेवरील कर्मचाऱ्यांना वेतन फरकाचे उर्वरित दोन्ही हप्ते ऑगस्ट २०२४ मध्ये रोखीने अदा करण्याची मागणी निवेदनात केली आहे. एक एप्रिल २०१९ ते ३१ मार्च २०२१ या कालावधीत सेवानिवृत्त झालेल्या कर्मचाऱ्यांना सातव्या वेतन आयोगानुसार देय असलेल्या उपदान, पेन्शन विक्री व इतर फरकाच्या सर्व रक्कमही ऑगस्ट २०२४ मध्ये अदा कराव्यात, अशी मागणीही संघटनेने केली आहे.(latest marathi news)