Nashik Rural Police : ग्रामीण पोलिस दलाच्या ताफ्यात नव्या 75 दुचाकी; पालकमंत्री भुसेंच्या हस्ते लोकार्पण

Nashik News : नाशिक ग्रामीण पोलिस दलाच्या ताफ्यात नव्याने ७५ दुचाकी सामाविष्ट झाल्या आहेत. पालकमंत्री दादा भुसे यांच्या हस्ते या वाहनांना शनिवारी (ता. २०) हिरवा झेंडा दाखविण्यात आला. आडगाव येथील नाशिक ग्रामीण पोलिस अधीक्षक कार्यालयाच्या कवायत मैदानावर नवीन वाहनांचे लोकार्पण झाले. (New 75 two wheelers in fleet of rural police force)

पालकमंत्री दादा भुसे, नाशिक परिक्षेत्राचे विशेष पोलिस महानिरीक्षक दत्ता कराळे, जिल्हा पोलिस अधीक्षक विक्रम देशमाने, अपर अधीक्षक आदित्य मिरखेलकर उपस्थित होते. नाशिक ग्रामीण पोलिस दलांतर्गत ४० पोलिस ठाणे असून, आठ उपविभागीय कार्यालये आणि नाशिक व मालेगाव येथे अपर अधीक्षक कार्यालय आहे.

डायल ११२ योजना कार्यान्वित असल्याने नागरिकांच्या तक्रारींना तत्काळ प्रतिसाद देण्यासाठी वाहनांची आवश्यकता होती. जिल्हाधिकारी कार्यालयामार्फत अधीक्षक कार्यालयाने दुचाकी वाहनांची मागणी नोंदविली होती. (latest marathi news)

त्यानुसार ७५ दुचाकी अधीक्षक कार्यालयासाठी प्रदान करण्यात आल्या. यात ४५ होंडा शाइन, तर ३० पल्सर आहेत. या वाहनांमुळे पोलिसांना ग्रामीण भागात गस्त करणे आणि डायल ११२ वर आलेल्या तक्रारींना तत्काळ प्रतिसाद देणे शक्य होणार आहे.

मुख्यालयाचे उपअधीक्षक नितीनकुमार गोकावे, उपअधीक्षक बापूराव दडस, विशेष शाखेचे पोलिस निरीक्षक विजय करे, स्थानिक गुन्हेशाखेचे पोलिस निरीक्षक राजू सुर्वे, जिल्हा वाहतूक शाखेचे निरीक्षक दत्ता चौधरी यांच्यासह अंमलदार, कर्मचारी उपस्थित होते.