Nashik News : लाखांहून अधिक विद्यार्थ्यांना जंतनाशक गोळ्यांचे वाटप

Nashik News : निफाड तालुक्यात आरोग्य विभागातर्फे जंतविरोधी मोहीम प्रभावीपणे राबविण्यात आली. सुमारे एक लाखांहून अधिक विद्यार्थ्यांना जंतनाशक गोळ्यांचे वाटप करण्यात आले.

शिल्लक लाभार्थ्यांना मंगळवारी (ता. २०) गोळ्यांचे वाटप होणार आहे. (nashik news Distribution of deworming pills to more than lakh students in district nashik news)

विद्यार्थ्यांना सदृढ आरोग्य राहण्याच्या दृष्टीने ही मोहीम महत्त्वाची ठरणार आहे. पोटातील जंतवाढीमुळे अनेक मुलांच्या शारीरीक वाढीवर परिणाम होऊन स्वास्थ बिघडते. हे हेरून आरोग्य विभागातर्फे सहा महिन्यांतून एकदा जंतविरोधी ‘अल्बेडाझोल’ गोळ्यांचे वाटप शाळेतून केले जाते.

शाळाबाह्य मुलांनाही गोळ्या दिल्या जातात. निफाड तालुक्यात अंगणवाडी, प्राथमिक शाळा, माध्यमिक शाळेत गोळ्यांचे वाटप करण्यात आले. निफाड तालुक्यात एक लाख ३७ हजार बालकांना जंतविरोधी गोळ्या देण्याचे उद्दिष्ट होते.

त्यात एक लाखांहून अधिक लाभार्थ्यांना त्या देण्यात आल्या आहेत. निफाड तालुक्याचे तालुका आरोग्याधिकारी डॉ. सुजित कोशिरे यांच्या मार्गदर्शनाखाली मोहीम राबविण्यात आली. पिंपळगाव बसवंत आरोग्य केद्रांतर्गत डॉ. वैशाली कदम, डॉ. योगेश धनवटे, आरोग्य सहाय्यक शरद तिडके यांच्या मार्गदर्शनाखाली १८ हजार विद्यार्थ्यांना जंतनाशक गोळ्यांचे वाटप करण्यात आले.