Nashik News : आनंद बोरांच्या छायाचित्रास तिसरे राष्ट्रीय पारितोषिक

नाशिक : स्वातंत्र्याच्या अमृतमहोत्सवांतर्गत राष्ट्रीय रस्ते वाहतूक आणि महामार्ग मंत्रालयातर्फे देशातील आणि हौशी छायाचित्रकारांसाठी डिजिटल छायाचित्र स्पर्धा झाली. ‘नॅशनल हायवेज थ्रू द आइज ऑफ द कॅमेरा’ ही स्पर्धेची संकल्पना होती. ‘सकाळ’चे बातमीदार आनंद बोरा यांच्या छायाचित्रास या स्पर्धेत तिसरे पारितोषिक जाहीर झाले. वीस हजार रुपये आणि सन्मानपत्र असे पुरस्काराचे स्वरूप आहे.

हेही वाचा: ज्ञानेश्वरीत आहेत HR निगडित व्यवस्थापन सूत्रे...

हिंदुहृदयसम्राट बाळासाहेब ठाकरे समृद्धी महामार्गाचे सिन्नरजवळील छायाचित्र श्री. बोरा यांनी टिपले होते. त्यास हे पारितोषिक मिळाले आहे. समृद्धी महामार्ग देखरेख उपजिल्हाधिकारी विठ्ठल सोनवणे, राष्ट्रीय रस्ते वाहतूक आणि महामार्गाचे सरव्यवस्थापक राम सिंघ यांनी त्यांचे अभिनंदन केले. छायाचित्राच्या माध्यमाचा वापर करून स्पर्धेद्वारे देशातील राष्ट्रीय महामार्गांच्या बहुआयामी प्रतिमांची छायाचित्रे सादर करायची होती.

महामार्गांचे सौंदर्यशास्त्र आणि विस्तार, महामार्ग पायाभूत सुविधा प्रकल्पांच्या अंमलबजावणीद्वारे होत असलेल्या दळणवळण सुविधा आणि सुलभ प्रवेशाचा संदेश देण्याच्या उद्देशाने ही स्पर्धा झाली. महामार्गांच्या कामाची माहिती जनतेला व्हावी, असाही उद्देश स्पर्धेचा होता. पारितोषिक वितरण लवकरच होणार आहे.