Nashik News : HAL कामगार संघटनेच्या वार्षिक सभेत गदारोळ; विरोधकांची प्रतिसभा

Nashik News : येथील एचएएल कामगार संघटनेच्या वार्षिक सर्वसाधारण सभेत प्रचंड गदारोळ झाला. सभेच्या अध्यक्षस्थानी अनिल मंडलिक होते. सभा शांतपणे सुरू असताना सुरवातीच्या तीन विषयांना मंजूर दिली. बदली होऊन आलेल्या कामगार बांधवांनी संघटनेचे सरचिटणीस संजय कुटे व सर्व संघटनेचे आभार मानले. ( Uproar in annual meeting of HAL labor union)

त्यानंतर ऐनवेळी येणाऱ्या विषयावर माजी पदाधिकारी गिरीश वलवे हे उभे राहिले असता काही पदाधिकाऱ्यांनी त्यांना मज्जाव करण्याचा प्रयत्न केला. यामुळे मोठा गदारोळ झाला. ठरलेल्या क्रमानुसार पुढील प्रश्न मांडण्यासाठी कामगार गिरीश वलवे यांना बोलण्याची संधी दिली असता ते मुद्दे मांडताना काही कामगारांनी त्यांना बोलण्यास विरोध केला.

यावेळी शाब्दिक चकमक होऊन सभेत उपस्थित पोलिस कर्मचारी यांनी हा विषय शांत करण्याचा प्रयत्नही केला. परंतु उपस्थित एका महिला पोलिस कर्मचाऱ्याने येथील कामगारांना अर्वाच्य, शिवराळ भाषा वापरत लाथा मारल्यामुळे सभेत तणाव निर्माण झाला.

संघटनेच्या इतिहासात पहिल्यांदाच एका पोलिसाकडून झालेल्या या गैरवर्तणूकप्रकरणी पोलिस अधीक्षक यांनी तातडीने दखल घ्यावी, असे निवेदन ओझरचे पोलिस निरीक्षक अरुण धनवडे यांना देण्यात आले आहे. कामगारांकडून मोठ्या प्रमाणावर संताप व्यक्त होत असून संबंधित महिला पोलिस कर्मचाऱ्यावर कठोर कारवाईची मागणी या निवेदनात संघटनेने केली.

विरोधकांचा सभात्याग व प्रती सभा

माजी सरचिटणीस सचिन ढोमसे व गिरीश वलवे यांनी आपल्या समर्थकांसह सभात्याग करत प्रतिसभा घेतली. यावेळी झालेल्या प्रकाराबद्दल दोन्ही गटांकडून निषेध व्यक्त करण्यात आला. उर्वरित कामगारांचा घरवापसी मुद्दा ढोमसे यांनी मांडत सत्ताधारी पक्षाला विविध मुद्द्यांचा जाब विचारला.

यावेळी वलवे यांच्या गाडीची काच फोडल्याचे त्यांनी सांगितले. विरोधकांनी सभात्याग केल्याने पुढील विषयांवर सभा पुन्हा सुरू केली. त्यानंतर कामगारांनी प्रश्न मांडले. यावेळी संघटनेचे अध्यक्ष अनिल मंडलिक, सरचिटणीस संजय कुटे यांनी उत्तरे दिली. शेवटी राष्ट्रगीताने दोन्ही सभांचा समारोप झाला.