Nashik Police Recruitment : पावसाच्या विनाव्यत्ययात मैदानी चाचणी! ग्रामीणमध्ये 475, शहरात 281 पात्र

Nashik Police Recruitment : पोलीस भरतीच्या मैदानी चाचणीसाठी आलेल्या उमेदवारांना पहिल्या दिवशी पावसाने हजेरी लावली होती, परंतु दुसऱ्या दिवशी पावसाने उघडीप दिली. त्यामुळे शहर-ग्रामीण दलाच्या मैदानांवर उमेदवारांची चाचणी पार पडल्या. शहर आयुक्तालयाच्या मैदानी चाचणीत २८१ तर ग्रामीणच्या चाचणीत ४७५ उमेदवार पात्र ठरले आहेत. (Nashik Police Recruitment Field test without interruption of rain)

शहर पोलीस आयुक्तालयातर्फे पोलीस भरतीसाठीची मैदानी चाचणी पंचवटीतील मीनाताई ठाकरे स्टेडिअम येथे घेतली जात आहे. भरतीच्या दुसऱ्या दिवशी ५०१ उमेदवारांना पाचारण करण्यात आले होते. त्यापैकी १८५ उमेदवार मैदानी चाचणीला गैरहजर राहिले. ३१६ उमेदवारांची उंची व छातीची मोजमाप केली असता, ३५ उमेदवार अपात्र ठरले. २८१ उमेदवार मैदानी चाचणीसाठी पात्र ठरले. तर, एका उमेदवाराला शारीरिक व मैदानी चाचणीसाठी सवलत देण्यात आली आहे.

नाशिक ग्रामीण पोलीस दलाची मैदानी चाचणी आडगाव येथील मुख्यालयाच्या मैदानावर घेतली जात आहे. भरतीच्या दुसऱ्या दिवशी ९०६ उमेदवारांना पाचारण करण्यात आले असता, ३७३ जणांनी पाठ दाखविली. ५३३ आणि आदल्या दिवसातील चौघे असे ५३७ उमेदवारांची छाती व उंचीची मोजमाफ घेतली असता, ६१ उमेदवार अपात्र ठरले तर एकाने माघार घेतली. पात्र ठरलेल्या ४७५ उमेदवारांनी मैदानाची चाचणी दिली. यानंतर उमेदवारांना त्यांना मिळालेल्या गुणांचा तपशिल देण्यात आला. ग्रामीण मुख्यालयाच्या वस्तीगृहात उमेदवारांच्या निवासासह नाश्ता, पाण्याची व्यवस्था करण्यात आलेली आहे. (latest marathi news)

आयुक्तांची मैदानावर हजेरी

पोलीस आयुक्त संदीप कर्णिक यांनी गुरुवारी (ता. २०) सकाळी पंचवटीतील मीनाताई ठाकरे स्टेडिअम येथे सुरू असलेल्या पोलीस भरतीच्या मैदानी चाचणीप्रसंगी हजेरी लावली. यावेळी भरतीच्या कामकाजाचे प्रत्यक्ष पाहणी केली. यावेळी उपायुक्त प्रशांत बच्छाव, मोनिका राऊत, चंद्रकांत खांडवी यांची उपस्थिती होती. यावेळी आयुक्तांनी भरतीसाठी आलेल्या उमेदवारांसाठी असलेल्या सोयीसुविधांचीही माहिती घेत पाहणी केली.