Nashik Police Recruitment : निवड यादीतील उमेदवारांची उद्यापासून पडताळणी; शहर आयुक्तालय

Nashik News : गेल्या दीड महिन्यापासून सुरू असलेली पोलिस भरतीची प्रक्रिया अंतिम टप्प्यात पोचली आहे. मैदानी चाचणीनंतर लेखी परीक्षेची निवड यादी जाहीर केल्यानंतर मंगळवारपासून (ता. १६) यादीतील उमेदवारांच्या कागदपत्रांची पडताळणी केली जाणार आहे. सदरची पडताळणी पोलिस आयुक्तालयाच्या भीष्मराज सभागृहात होणार आहे. (Nashik Police Recruitment Verification of shortlisted candidates from tomorrow)

लोकसभा निवडणुकीची आचारसंहिता संपताच महाराष्ट्र पोलिस दलातील रखडलेली पोलिस भरतीची प्रक्रिया सुरू करण्यात आली. शहर पोलिस आयुक्तालयातील रिक्त ११८ शिपाई पदासाठी मैदानी चाचणी घेण्यात आली. ३० जून रोजी मैदानी चाचणी आटोपली. त्यानंतर, पात्र ठरलेल्या सुमारे साडेचार हजार उमेदवारांनी लेखी परीक्षा दिली.

या परीक्षेचा गेल्या आठवड्यात कटऑफ जाहीर करण्यात आला आहे. त्यानुसार, ११८ जणांची तात्पुरती निवड यादी जाहीर करण्यात आली आहे. या निवड यादीतील उमेदवारांच्या कागदपत्रांची पडताळणी येत्या मंगळवारपासून (ता. १६) केली जाणार आहे.

यासाठी उमेदवारांनी पोलिस मुख्यालयातील भीष्मराज बाम सभागृह याठिकाणी सकाळी १० वाजता उपस्थित राहण्याचे आवाहन पोलिस उपायुक्त चंद्रकांत खांडवी यांनी केले आहे. यावेळी येताना उमेदवारांनी मूळ कागदपत्रांसह ऑनलाईन आवेदन अर्जाची प्रत, चेस्ट क्रमांक कागद, लेखी परीक्षा पडताळणी प्रत. (latest marathi news)

तसेच मूळ कागदपत्रांची झेरॉक्स प्रत, सहा पासपोर्ट साईज छायाचित्रही आणायचे आहेत. यावेळी उमेदवारांची कार्यालयाच्या अभिलेख्यावरील फोटोवरून, तसेच, बायोमॅट्रिक थमद्वारे पडताळणी केली जाणार आहे, असेही आयुक्तालयातर्फे स्पष्ट करण्यात आलेले आहे.

ऑगस्टपासून प्रशिक्षण

जुलैअखेरपर्यंत पोलिस भरतीची प्रक्रिया संपवून, निवड करण्यात आलेल्या उमेदवारांना पोलिस प्रशिक्षण केंद्रांत प्रशिक्षणांसाठी पाठविले जाणार आहे. ऑगस्टपासून या प्रशिक्षणार्थी पोलिस शिपायांचे प्रशिक्षण सुरू होण्याची शक्यता आहे. ऑक्टोबर-नोव्हेंबर महिन्यात राज्यात विधानसभेच्या निवडणुका असल्याने त्या काळात या प्रशिक्षणार्थींचा वापर बंदोबस्तासाठी होणार आहे.