Nashik Agriculture News : क्रॉपकव्हरद्वारे वाढलेल्या रेडग्लोब द्राक्षबागेला प्रधान सचिवांनी भेट

Nashik News : दिंडोरी तालुक्यातील मोहाडी येथील महिला शेतकरी श्रीमती मीराबाई श्रीपत जाधव यांच्या क्रॉपकव्हरमध्ये वाढविलेल्या रेडग्लोब द्राक्षांच्या बागेला महाराष्ट्र शासनाच्या कृषी विभागाच्या प्रधान सचिव श्रीमती व्ही. राधा, कृषी आयुक्त रवींद्र बिनवडे, उपसचिव प्रतिभा पाटील, नाशिक विभागाचे कृषी अधिकारी यांनी भेट दिली. (Principal Secretary visits Red Globe vineyard grown through crop cover)

या आधुनिक तंत्रज्ञानाने बहरलेल्या द्राक्षबागेला त्यांनी भेट देऊन अभ्यास दौरा करीत पाहणी केली. या वेळी भर पाऊस पडत असतानाही हा अभ्यास दौरा विशेष फायदेशीर ठरला. क्रॉपकव्हरचे विविध फायदे समजावून घेतले. या वेळी श्रीमती राधा यांनी द्राक्षबागेसाठी क्रॉपकव्हरचा किती खर्च येतो, क्रॉपकव्हरचे मटेरियल ते बांधणीसाठी लागणाऱ्या स्ट्रक्चरसंदर्भातील सर्व बाबी जाणून घेतल्या.

तसेच, क्रॉपकव्हर वापरल्यास पेस्टीसाईडच्या वापरात काय फायदा होतो? गेल्याच वर्षांत दोन वेळेस क्रॉपकव्हरच्या वापरामुळे पडलेल्या गारांपासून द्राक्षपिकाचे कसे संरक्षण झाले, ते जाणून घेतले. क्रॉपकव्हरमुळे उन्हाळ्यात द्राक्ष पिकाचा अति तापमानात कसा फायदा होतो, हेही माहिती करून घेतले. (latest marathi news)

क्रॉपकव्हर वापरल्यास दर्जेदार द्राक्ष उत्पादन कसे होईल, याची बारकाईने माहिती घेतली. याचबरोबर क्रॉपकव्हरचे तोटे व त्याचा उपयुक्त कालावधी यांचाही सखोल आढावा घेतला. तसेच, या संदर्भातील अनुदान योजनांचा उपस्थित अधिकारी वर्गाकडून आढावा घेण्यात आला.

नवीन प्रयोग करणाऱ्या शेतकऱ्यांच्या बांधावर येत कृषी विभागाच्या प्रधान सचिव दर्जाच्या अधिकाऱ्यांनी भेट दिल्याने निश्चितच नवी ऊर्जा मिळाली. नवीन प्रयोग केल्याबद्दल मोहाडी (ता. दिंडोरी) येथील महिला शेतकरी श्रीमती मीराबाई श्रीपत जाधव-पाटील यांचे कौतुक केले व शुभेच्छा दिल्या.