Nashik Rain Update: गिरणाचा जलसाठा 10 हजार दशलक्ष घनफुटावर

मालेगाव : कसमादेत पावसाचा रुसवा-फुगवा सुरुच आहे. मोठ्या प्रतिक्षेनंतर गेल्या आठवड्यात समाधानकारक पावसाने हजेरी लावली.

विशेषत: हरणबारी, चणकापूर, पुनंद, केळझर या धरण पाणलोट क्षेत्रात झालेल्या मुसळधार पावसामुळे गिरणा व मोसम या दोन्ही प्रमुख नद्यांना प्रथमच या हंगामात पुर आले. (Nashik Rain Update girna dam water at 10 thousand million cubic feet)

याठिकाणी सुरु असलेल्या पावसामुळे हरणबारीतून ५२३ क्युसेक पाणी मोसम नदीत तर चणकापूरमधून ३६७ क्युसेक पाणी गिरणा नदीपात्रात वाहत आहे. पुरपाण्यामुळे उत्तर महाराष्ट्रातील सर्वात मोठे असलेल्या गिरणा धरणातील जलसाठ्यात झपाट्याने वाढ असून धरण ५४ टक्के भरले आहे.

गिरणा धरणाची साठवण क्षमता २१ हजार ५०० दशलक्ष घनफूट आहे. यातील ३ हजार दशलक्ष घनफूट मृत साठा आहे. गेल्या तीन वर्षापासून धरण शंभर टक्के भरत आहे. यावर्षी पावसाने ओढ दिल्यामुळे गिरणा, मोसमला हंगामातील पहिला पुर येण्यास सप्टेंबर उजाडला. पावसाळ्यातील तीन महिने पुरेसा पाऊस झाला नाही.

हेही वाचा : Credit Card फसवणूक....काय घ्याल काळजी?

कसमादेतील हरणबारी, चणकापूर, पुनंद, केळझर ही धरणे भरल्यानंतरच गिरणातील जलसाठा वाढतो. हरणबारी वगळता इतर तीनही धरणे उशिरा भरली.

कसमादेतील धरणे भरल्यानंतर त्यांच्यातून सोडण्यात येणाऱ्या पाण्याच्या विसर्गामुळे गिरणा व मोसम या दोन्ही नद्यांना पुरपाणी येते. पुरपाण्यातूनच गिरणा धरणाचा जलसाठा वाढतो.

गिरणा धरण ५४ टक्के भरल्याने मालेगावसह खानदेशचा पिण्याच्या पाण्याचा प्रश्‍न निकाली निघाला आहे. पावसाळा अजून महिनाभर आहे. या कालावधीत चांगला पाऊस झाल्यास धरणातील जलसाठा आणखी वाढू शकेल.