Illegal Sand Mining : अवैध वाळू उपसा रोखण्यासाठी रस्त्यावर खड्डे; प्रशासनाकडून कारवाई

Nashik News : तालुक्यातील लोहणेर-ठेंगोडा गावादरम्यान वाहणाऱ्या गिरणा नदीपात्रातून बेसुमार वाळू उपसा होत असल्याची बातमी प्रकाशित केल्यानंतर महसूल आणि पोलिस प्रशासन ऍक्शन मोडवर आले आहे. गिरणा नदीपात्रातून अवैधरित्या होणारी वाळूची वाहतूक रोखण्यासाठी देवळा तालुका महसूल प्रशासनाने गिरणानदी पात्रात जाणाऱ्या रस्त्यांवर जेसीबीच्या साहाय्याने ठिकठिकाणी मोठे मोठे खड्डे खोदून अटकाव केला आहे. (Illegal Sand Mining)

गिरणा नदीपात्रातून होणारा अवैध वाळू उपसा होत असल्याचे वृत्त दैनिक 'सकाळ' ने प्रसिद्ध करत याकडे लक्ष वेधले होते. या पार्श्वभूमीवर हा अवैध वाळू उपसा रोखण्यासाठी भरारी पथके कार्यान्वित करण्यात आले असून या पथकांच्या माध्यमातून अवैध वाळू उपशाला अंकुश लावला जाणार आहे.

तसेच गिरणा नदीपात्रात जाण्यासाठी वाळूमाफिया ज्या मार्गांचा वापर करतात, त्या रस्त्यांवर महसूल प्रशासनाच्यावतीने जेसीबीच्या साहाय्याने रस्त्यावर मोठया चाऱ्या खोदत हे मार्ग बंद करण्यात आले आहेत. (latest marathi news)

खड्डे बुजविणाऱ्यांवर कारवाई

अवैध वाळू उपसा रोखण्यासाठी देवळा प्रशासनाकडून वाळू वाहतूक करणाऱ्या रस्त्यावर मोठ्या प्रमाणात खड्डे करत वाहतुकीचा रस्ता बंद करण्यात आला. जर वाळू माफियांनी हे रस्ते बुजवल्यास अवैध वाळू उत्खनन व वाहतूक करणाऱ्यांविरुद्ध फौजदारी प्रक्रिया संहितांतर्गत गुन्हे दाखल करून दंडात्मक कारवाई करण्यात येईल असा इशारा डॉ. मिलिंद कुलकर्णी यांनी दिला आहे. यामुळे रात्री-बेरात्री होणाऱ्या अवैध वाळू वाहतुकीला आळा बसेल अशी नागरिक व्यक्त करत आहे.

"अवैध वाळू उपसा रोखण्यासाठी प्रशासनाने वाळू वाहतूक होणाऱ्या रस्त्यावर खड्डे खोदले आहे. यामुळे वाळू उपसा करणाऱ्यांवर अंकुश बसेल. जर हे खड्डे कुणी बुजविले त्यावर कारवाई करण्यात येईल." - डॉ. मिलिंद कुलकर्णी, तहसीलदार देवळा