Nashik Band Hindu Morcha: नाशिक सकल हिंदू समाजाच्या मोर्चादरम्यान तणाव, परिस्थिती नियंत्रणात

Nashik Band Update 16 August 2024 Sakal Hindu Morcha

नाशिक : बांगलादेशमधील हिंदूवरील अत्याचार आणि मंदिरामधील मोडतोडीच्या निषेधार्थ नाशिकमध्ये शुक्रवारी बंदची हाक देण्यात आली. सकल हिंदू समाजातर्फे काढण्यात आलेल्या मोर्चामुळे काही काळ तणाव निर्माण झाला होता. सध्या परिस्थिती नियंत्रणात असून शहरात पोलिसांचा बंदोबस्त वाढवण्यात आला आहे.

बांगलादेशात गेल्या काही दिवसांपासून हिसांचार सुरू आहे. यादरम्यान हिंदू बांधवांवर होत असलेले हल्ले, मंदिरांची मोडतोड केली जात आहे. यादरम्यान बांगलादेशी सैन्यदलाने हिंदूंच्‍या रक्षणाचे आश्वासन दिले असले, तरी केंद्र शासनाने त्यांच्‍यावर अवलंबून न राहता हिंदू समाज व मंदिरांच्या रक्षणासाठी तातडीने पावले उचलावीत, अशी मागणी सकल हिंदू समाजाच्या पदाधिकाऱ्यांकडून केला जात आहे. यादरम्यान बांगलादेशमधील हिंसेचा निषेध नोंदविण्यासाठी शुक्रवारी (ता.१६) जिल्‍हा बंदची हाक देण्यात आली होती.

आज आयोजित करण्यात आलेल्या या मोर्चावेळी काही नागरिकांकडून दुकाने बंद करण्यास नकार दिल्याने दोन गटात वाद झाल्याचे सांगितले जात आहे. दरम्यान सध्या परिस्थिती नियंत्रणात असून पोलिसांकडून परिसरात अतिरिक्त कुमक तैनात करण्यात आली असून योग्य ती खबरदारी घेतली जात आहे. तसेच यावेळी नागरिकांनी अफवांवर विश्वास ठेवू नये असे अवाहन देखील केले जात आहे.

दरम्यान नाशिक शहरामधील दोन्ही हिंदू-मुस्लिम समाजातील युवकांना सांगणे आहे की कोणीही कायदा हातात घेऊ नये. सर्वांनी शांतता ठेवून पोलिसांना सहकार्य करावे. यामधून कुठलेही हानी होणार नाही, कोणाच्याही धार्मिक स्थळावर घाला घालू नये अशी विनंती यावेळी सकल हिंदू समाजाच्या पदाधिकाऱ्यांकडून करण्यात आली.