Nashik News : अवकाशातून पडले शास्त्रीय कोरियन उपकरण! अंदरसूलला शेतकऱ्यांमध्ये भीतीचे वातावरण

अंदरसूल : येथील शेतकरी डॉ. हरीश रोकडे यांच्या शेतात गुरुवारी रात्री अवकाशातून कोरियन बनावटीचे शास्त्रीय उपकरण पडले. उपकरणाचा आवाज व चमकणाऱ्या लाल दिव्याने परिसरात भीतीचे वातावरण पसरले आहे. दरम्यान, याबाबत डॉ. रोकडे यांनी तलाठी कमलेश पाटील यांना माहिती दिली. ()Nashik scientific Korean device fell from space in Andarsul)

गुरुवारी (ता. १९) साडेसातच्या सुमारास येथील शेतकरी डॉ. रोकडे यांच्या शेतात अवकाशातून काहीतरी उपकरण पडताना शेतकऱ्यांनी पाहिले. या उपकरणातून लाल रंगाचा प्रकाश दिसत असून, किरकिर असा भयंकर आवाज येत असल्याने त्यांच्यात भीतीचे वातावरण पसरले होते. याबाबत शेतकरी रोकडे यांनी तलाठी कमलेश पाटील यांना आमच्या शेतात अवकाशातून काहीतरी उपकरण पडलेले आहे.

त्याचा आवाज येत असून, लाल रंगाचा प्रकाशही दिसत आहे, अशी माहिती दिली. तलाठी पाटील यांनी तत्काळ रोकडे यांच्या शेतात जाऊन शेतात पडलेल्या या उपकरणाची पाहणी केली असता शेतात पडलेल्या शास्त्रीय उपकरणावर कोरियन अक्षरात लिहिल्याचे दिसून आल्याने तलाठी पाटील यांनी तहसीलदार आबा महाजन यांना या संदर्भातील माहिती दिली.