Nashik News : शिवसेना-महायुतीमध्ये मंडप उभारणीवरून वादावादी! दोघांना एकाच मैदानावर परवानगी: अधिकाऱ्यांच्या भूमिकेकडे लक्ष

इंदिरानगर : वासननगर येथील गामने मैदानावर दांडिया राससाठी शिवसेनेला (उबाठा) सिडकोच्या विभागीय कार्यालयातर्फे परवानगी मिळाली यानंतर मंगळवारी (ता. २४) महायुतीच्या सह्याद्री युवक मंडळ आणि पाथर्डी पंचक्रोशी सांस्कृतिक मंडळालादेखील राजीव गांधी भवन येथून याच मैदानावर दांडिया भरण्यासाठी परवानगी मिळाली. परवानगी मिळाल्यानंतर मंडप उभारणीवरून दुपारी चारच्या सुमारास दोन्ही गट पुन्हा समोरासमोर आले. (Shiv Sena Mahayuti dispute over mandap construction )

पोलिस निरीक्षक अशोक शरमाळे, सहायक निरीक्षक सुनील अंकोलीकर, उपनिरीक्षक धनराज पाटील यांनी या ठिकाणी येत महापालिकेच्या अधिकाऱ्यांना जागेवर बोलावत कुणाला नेमक्या किती आणि काय अटी- शर्तीनुसार परवानगी दिल्या आहेत, हे स्पष्ट करण्यास सांगितले आहे.

शिवसेनेचे विभागप्रमुख रवींद्र गामने यांनी सिडको कार्यालयात जागेची परवानगी घेतली आहे. त्यांनी मंगळवारी प्रत्यक्ष कामाला सुरवात केली. दुपारी महायुतीच्या शिवसेनेचे (शिंदे) माजी नगरसेवक अमोल जाधव, भाजपचे भगवान दोंदे, राष्ट्रवादीचे सोमनाथ बोराडे हे या ठिकाणी आले आणि मैदानाच्या पश्चिम बाजूकडून भाजी बाजाराकडे ५० मीटर अंतर सोडून साठ हजार चौरस फूट जागेची परवानगी आम्हाला मिळाल्याचे पत्र त्यांनी दाखवले. (latest marathi news)

सध्या सुरू असणारे काम त्याच भागात असल्याने ते थांबवण्याची मागणी केली. त्यानंतर किरकोळ वादावादी झाली. दरम्यान, गामने यांनी निरोप दिल्याने युवा सेनेचे जिल्हाप्रमुख बाळकृष्ण शिरसाट, उपमहानगरप्रमुख नीलेश साळुंखे, त्र्यंबक कोंबडे, मदन डेमसे, दादा मेढे, धनंजय गवळी आदींसह कार्यकर्ते येथे जमा झाले.

सध्या सुरू असलेले काम सह्याद्री मंडळाला परवानगी देण्यात आलेल्या जागेत सुरू असल्याने ते त्वरित थांबवावे, अशी विनंती जाधव आणि सहकार्यांनी पोलिसांकडे केली. पोलिस अधिकाऱ्यांनी हा वाद समजून घेत मनपा अधिकाऱ्यांना याबाबत जागेवर प्रत्यक्ष येऊन परवानगीबाबत स्पष्टता आणण्यास सांगितले आहे. दरम्यान बुधवारी (ता. २५) महापालिकेचे अधिकारी आता याबाबत काय निर्णय घेतात, याकडे सर्वांचे लक्ष लागले आहे.