Success Story: नौकानयन स्पर्धेत अनुष्का - संस्कृतीची डझनभर पदकाची कमाई! ध्येय गाठण्यासाठी प्रतिकुल परिस्थितीशी अविरत संघर्ष

पिंपळगांव बसवंत : एखादा निश्‍चय केला आणि ते ध्येय गाठण्यासाठी परिस्थिती कितीही प्रतिकुल असली तरी काहीजण माघारी फिरत नाही. उलट जिद्दीने लढून लक्ष्याचा पाठलाग करतात. पिंपळगाव बसवंत महाविद्यालयातील अनुष्का आंबेकर व संस्कृती शिंगाडे या दोन विद्यार्थींनिंनी प्रतिकुल परिस्थितीशी संघर्ष करीत शिक्षणाबरोबर सरावात सातत्य ठेवल्याने नौकानयन स्पर्धेत डझनभर पदकांची कमाई केली आहे. (Nashik Success Story Anushka Sanskriti wins medals in sailing news)

कोकणगाव (ता. निफाड) येथील संस्कृती सोमनाथ शिंगाडे पिंपळगाव महाविद्यालयात चौथ्या वर्षात शिक्षण घेते. संस्कृतीच्या घरची आर्थिक परिस्थिती तर बेताची आहे. त्यात दोन वर्षापूवी कोविडच्या थैमानात संस्कृतीची आई वृषाली शिंगांडे यांचे निधन झाले. वडील, भाऊ व स्वत: संस्कृती असे तिघांचेच कुटुंब आहे. घरातील स्वयंपाक करून दररोज सकाळी सहा वाजता संस्कृती कादवा नदीत नौकानयनच्या सरावासाठी जाते.

संस्कृतीसमवेत अनुष्का आंबेकर देखील सराव करते. वडील संतोष आंबेकर हे अनुष्काला नौकानयन क्रीडा प्रकारासाठी सातत्याने प्रोत्साहीत करतात. आंबेकर हे शिलाईकाम करून कुटुंबाचा उदरनिर्वाह चालवितात. संस्कृती व अनुष्काचे नौकानयन खेळातील कौशल्य पाहून क्रीडाशिक्षक प्रा. हेमंत पाटील देखील प्रभावीत झाले. (latest marathi news)

प्रा. पाटील यांनी दोघींना मार्गदर्शन करण्यास सुरवात केली आहे. सात वर्षाचे परिश्रम आता फळाला येत आहे. महाराष्ट्र संघाकडून खेळताना भारतात झालेल्या सी १-२ नौकानयनच्या महाराष्ट्र ऑलिम्पिकमध्ये पाच सुवर्णपदके, राष्ट्रीय स्पर्धेत ब्रांझ मेडल, राज्यस्तरीय सहा सुवर्णपदके, युनिव्हर्सलसाठी दोन सिल्व्हर व ब्रांझ मेडलची कमाई केली आहे. चमकदार कामगिरी करून संस्कृती व अनुष्का आता आंतरराष्ट्रीय पातळीवरील सामन्यात पदकांना गवसणी घालण्याच्या तयारीत आहे.