Success Story : माधवगिरी मागणाऱ्या कुटुंबातील तरुण PSI! राजापूर येथील जनार्धन बैरागीचे देदीप्यमान यश

येवला‌ : ध्येय, प्रबळ इच्छाशक्ती अन्‌ प्रचंड मेहनती घेतली तर भाग्य उजाळल्याशिवाय राहत नाही हे सिद्ध केले आहे राजापूर येथील जनार्धन बैरागी याने. वडीलांचे भाग्य नशिबात नाही आणि आई मोलमजुरी करते. आईच्या कुटुंबाला माधवगिरी (भिक्षा) मागण्याची परंपरा आहे. अशा सर्वसाधारण कुटुंबातील जनार्धन याने थेट दिल्लीत पीएसआयपदाला गवसणी घातली. याचवेळी वन विभागातही त्याला नियुक्ती मिळाली आहे. (Nashik Success Story PSI Janardhan Bairagi from Rajapur marathi news)

राजापूर येथील गरीब कुटुंबातील जनार्दन बैरागी याने मिळविलेले यश नव्या पिढीला प्रेरणादायी नव्हे, तर आदर्शवतच आहे. राजापूर येथे त्याचा सत्कार झाला. जनार्दनची आई बालूताई यांनी टेलरिंग काम करून दोन मुलांचे शिक्षण केले. बालूताई बैरागी, आजोबा भीमाबाबा बैरागी, मामा गणेश बैरागी यांनी मुलांसाठी विशेष मेहनत घेतली.

मुलाने आईच्या कष्टाचे चीज साध्य करून दाखविले. आजोबाचे वडील (वै.) हिरामणबाबा बैरागी यांच्या आशीर्वादाने भिमाबाबा बैरागी आजही रोज गावात भिक्षा मागतात. या भिक्षेचे फळ जनार्दन बैरागी यांना मिळाले आहे. जनार्दनची डीजेच्या तालावर मिरवणूक काढण्यात आली. (Latest Marathi News)

जनार्दनचा मामा गणेश रंगकाम करीत असल्याने तोही त्यांना मदत करायचा. दुसऱ्याच्या शेतात कापूस वेचणी, कांदालागवड असे रोजंदारीची काम करून आपले शिक्षण राजापूर व नंतर येवला येथे केले. त्याने कष्टाने मिळविलेले यश भूषणावह असल्याने जनार्दन व त्यांच्या आई बालूताई बैरागी सत्कार झाला. लक्ष्मण घुगे, उपसरपंच ज्ञानेश्वर दराडे, पोपट आव्हाड, प्रमोद बोडके, विजय वाघ, माऊली महाराज, योगेश अलगट आदींनी जनार्दन बैरागी यांनी त्यांच्या मेहनतीचे कौतुक केले.

माजी सरपंच सुभाष वाघ, पोपट आव्हाड, संजय वाघ, संजय भाबड, तुळशीराम विंचू, जगदीश वाघ, दत्तू दराडे, अशोक आव्हाड, शिवाजी बोडके, शंकर अलगट, समाधान चव्हाण, अनिल अलगट, रामकृष्ण बांगर, संजय कासार, सोमनाथ बांगर, जगदीश वाघ, दिलीप अलगट, अनिल घुगे, सुभाष वाघ, समाधान पालवे, शंकर मगर, वाल्मीक घुगे, सचिन बैरागी, सौरभ बैरागी व बैरागी परिवारातील नातेवाईक उपस्थित होते.