Nashik Summer Heat : मालेगावचा पारा 43.2 अंशावर! उन्हाच्या तडाख्याने नागरिक हैराण

Nashik News : शहर व परिसरातील तापमानाचा पारा आजही कायम होता. येथील तापमानाच्या बाबतीत ‘पारा वाढता वाढता वाढेच’ अशी स्थिती आहे. मंगळवारपेक्षा बुधवारी (ता. २२) तापमानात आणखी वाढ झाली. मंगळवारी (ता. २१) पारा ४३ अंशावर होता. बुधवारी येथे ४३.२ अंश सेल्सिअस तापमान नोंदविले गेले. (Summer Heat Malegaon mercury at 43 degrees)

सकाळी सहापासूनच उन्हाच्या झळा असह्य झाल्या होत्या. रात्री आठपर्यंत उन्हाच्या झळा जाणवत होत्या. उन्हाच्या तडाख्याने नागरिक हैराण आहेत. गेल्या आठवड्यातील अवकाळीनंतर तीन दिवसांपासून सूर्यनारायणाचा प्रकोप जाणवत आहे. अतिउष्णतेच्या लाटा व वाढत्या तापमानामुळे लहान मुले, वृद्ध, गर्भवती, अपघातग्रस्त रुग्ण त्रस्त आहेत.

उकाड्याने हैराण झालेले नागरिक गच्ची, बंगल्याच्या टेरेसवर झोपण्याला पसंती देत असले तरी रात्रीदेखील उष्म्यामुळे अंगाची लाही लाही होत आहे. त्यातच हवा नसल्याने झळांचा तडाखा चांगलाच जाणवत आहे. उन्हात फिरणाऱ्यांना नाकातून रक्त येण्याचा त्रास होऊ लागला आहे. सायंकाळपर्यंत शहरातील बाजारपेठा ओस होत्या. (latest marathi news)

उष्णतेची लाट केव्हा ओसरणार, याच चिंतेने नागरिकांना ग्रासले आहे. आज सलग दुसऱ्या दिवशी तापमानाचा पारा कायम होता. यामुळे शहरातील जनजीवन व विविध व्यवसायांवरही काहीसा परिणाम झाला. अशातच वीजपुरवठा खंडित झाला तर अक्षरश: अंगाला काटा येत आहे.

काळजी घेण्याचे आवाहन

पंखे व अन्य विजेची उपकरणेही गरम हवा फेकू लागले असून, दुपारी घर, कार्यालय, आस्थापनांमध्ये बसणे मुश्कील झाले आहे. नागरिक उन्हापासून बचावासाठी विविध उपाययोजना करत आहेत. मॉन्सून सुरू होईपर्यंत तापमानाचा पारा कायम राहण्याची शक्यता असून, नागरिकांनी काळजी घ्यावी, असे आवाहन वैद्यकीय तज्ज्ञांनी केले आहे.