Nashik Teacher Constituency Result: नाशिकमध्ये मतमोजणी केंद्रावर गोंधळ! ठाकरे गटाच्या आक्षेपानंतर मतमोजणी प्रक्रिया थांबवली!

Nashik: नाशिकमध्ये मतमोजणी केंद्रामध्ये मतमोजणी प्रक्रिया थांबवण्यात आली आहे. एकाच मतपेटीत तब्बल ३ मतपत्रिका जास्त आढळून आल्या आहेत. त्यामुळे शिवसेना ठाकरे गटाने यावर आक्षेप घेतला आहे. त्यामुळे सध्या ही मतमोजणी प्रक्रिया थांबवण्यात आली आहे. या सर्व प्रकरामुळे मतमोजणी केंद्रावर प्रचंड गदारोळ पाहायला मिळत आहे.

जळगाव जिल्ह्यातील चोपडा गावातील २२ क्रमांकाच्या बुथवर ९३५ मतदान झालं आहे, पण मतपेटीमध्ये ९३८ मतपत्रिका आढळून आल्या आहेत. त्यामुळे ठाकरे गटाकडून यावर आक्षेप घेण्यात आला आहे. त्यामुळे सध्या ही मतपेटी बाजूला ठेवण्यात आली आहे. याप्रकरणी चौकशी करण्यात यावी. मुख्य निवडणूक आयोगाने याबाबत कारवाई करून निर्णय घ्यावा अशी मागणी केली जात आहे.

शिवसेना ठाकरे गटाचे नेते सुधाकर बडगुजर यांनी यावर प्रतिक्रिया दिली. ते म्हणाले की, '२२ क्रमांकावर ९३५ मतदान झाले असताना ९५८ मतपत्रिका आढळून आल्या आहेत. त्यामुळे सध्या मतमोजणी थांबवण्यात आली आहे. यामध्ये पारदर्शकता यावी. तीन मतपत्रिका कुठून आली. याची चौकशी करण्यात यावी.' इतर उमेदवारांनी देखील यावर आक्षेप घेतला आहे.

नाशिक शिक्षक मतदारसंघाच्या निवडणुकीसाठी एकूण २१ उमेदवार रिंगणात आहेत. शिवसेना ठाकरे गटाचे संदीप गुळवे, शिवसेना शिंदे गटाचे किशोर दराडे आणि राष्ट्रवादी अजित पवार गटाचे महेंद्र भावसार रिंगणात आहेत. याशिवाय अपक्ष उमेदवार विवेक कोल्हे यांचे देखील आव्हान असणार आहे. नाशिकमध्ये महायुतीचे उमेदवार समोरासमोर आल्याचं पाहायला मिळत आहे. चौरंगी लढतीत कोण बाजी मारतं याबाबत उत्सुकता असणार आहे.

विधान परिषदेच्या मुंबई पदवीधर, कोकण पदवीधर, मुंबई शिक्षक आणि नाशिक शिक्षक या चार मतदारसंघाचा आज निकाल लागणार आहे. या चार जागांसाठी २६ जून रोजी मतदान झाले होते.