Nashik Accident News : कारचे टायर फुटून झालेल्या अपघातात दोघांचा मृत्यू; 2 गंभीर जखमी

Nashik Accident News : पर्यटनासाठी गंगापूर रोड परिसरात गेलेल्या युवकांच्या गाडीचा गंभीर अपघात झाला. मंगळवारी (ता. २६) सायंकाळी झालेल्या या अपघातात युवक, युवतीचा मृत्यू झाला, तर अन्य दोघे गंभीर जखमी झाले. अपघात इतका भीषण होता, की कारचा अक्षरशः चेंदामेंदा झाला. टायर फुटल्याने हा अपघात घडल्याचे प्रथमदर्शनीकडू सांगितले जात असून, पोलिस अधिक तपास करत आहेत. (Nashik Two dead in car tire burst accident marathi news)

रिद्धी प्रशांत गुजराती (वय १८, रा. हिरावाडी रोड), नीरज रवींद्र धारणकर (१८, रा. काठे गल्ली, द्वारका) असे अपघातात मृत्यू झालेल्या दोघांची नावे आहेत. तर कार चालवत असलेला आर्यन फडकर (१७) आणि त्याच्या सोबत कारमध्ये पुढे बसलेली मृण्मयी अहिरे (१८) गंभीर जखमी झाले असून, त्यांच्यावर उपचार सुरू आहेत.

बारावीची परीक्षा संपल्याने सुट्यांचा आनंद घेण्यासाठी हे चौघे मित्र नाशिकबाहेर पर्यटनाला निघाले होते. त्यासाठी नातेवाइकांची कार घेत ते मंगळवारी सकाळी गंगापूर रोडच्या दिशेने निघाले होते. दिवसभर मौजमजा केल्यानंतर सायंकाळी घरी परतत असताना बारदान फाटा परिसरात कारचा टायर फुटल्याने गाडी रस्त्याच्या कडेला असलेल्या झाडावर आदळली.

गाडीचा वेग प्रचंड असल्याने गाडी कोलांट्या उड्या खात घसरत गेल्याने गाडीचा अक्षरशः चेंदामेंदा झाला. हा वर्दळीचा रस्ता असल्याने बघ्यांची गर्दी झाली होती. उपस्थितांपैकी काहींनी पुढे येत मदतकार्य केले. अपघातात मृत रिद्धी व नीरज हे दोघे मागे बसलेले होते.