Nashik Unseasonal Rain : पंचवटी परिसरात सायंकाळी अवकाळी पावसाच्‍या सरी

Nashik Unseasonal Rain : धुळे, जळगावसह उत्तर महाराष्ट्रात आणि मालेगाव परिसराला अवकाळीने झोडपलेले असताना बुधवारी (ता.२८) सायंकाळी नाशिक शहरात तुरळक स्‍वरूपात पाऊस झाला. पंचवटी परिसरात पावसाच्‍या सरींनी नागरिकांची तारांबळ उडाली. यामुळे सायंकाळनंतर वातावरणात काही प्रमाणात गारवा निर्माण झाला होता. ()

बुधवारी (ता.२८) नाशिकचे किमान तापमान १७.४ अंश सेल्सिअस तर कमाल तापमान ३५.४ अंश सेल्सिअस नोंदविले गेले. दिवसभर तप्त उन्‍हामुळे चटके बसत होते. सायंकाळच्‍या सुमारास आकाशात काळे ढग दाटून आले होते. तर सायंकाळी सातच्‍या सुमारास शहरातील काही भागांमध्ये तुरळक स्‍वरूपात सरी बरसल्या. रात्री उशिरापर्यंत ढगाळ वातावरण कायम होते. (latest marathi news)

नाशिकचे तापमान निचांकी

गेल्‍या दोन-तीन दिवसांत किमान तापमान तब्‍बल पाच अंश सेल्सिअसहून अधिक वाढ नोंदविली आहे. असे असतानाही नाशिकचे किमान तापमान राज्‍यात निचांकी नोंदविले गेले आहे. नाशिकपाठोपाठ महाबळेश्‍वरचे किमान तापमान १७.६ अंश सेल्सिअस आणि पुण्याचे तापमान १८.१ अंश सेल्सिअसची नोंद झाली आहे.