Nashik Vegetables Rate Hike : पालेभाज्या, फळभाज्यांना आला ‘भाव’! उन्हामुळे आवक घटत चालल्याचा परिणाम

Nashik : मार्चमध्ये उन्हाचा तडाखा वाढू लागल्याने सद्यःस्थितीत पालेभाज्या व फळभाज्यांची आवक सुमारे चाळीस ते पन्नास टक्क्यांनी घटली आहे. बहुतांश पालेभाज्या व फळभाज्यांचे दर वधारले आहेत. त्यामुळे गृहिणींचे महिन्याचे बजेट कोलमडले आहे. नाशिक कृषी उत्पन्न बाजार समितीत सद्यःस्थितीत नाशिक, सिन्नर, दिंडोरी, पिंपळगाव, त्र्यंबकेश्वर आदी भागांतून पालेभाज्या व फळभाज्या येत आहेत. (Nashik Vegetables fruits Rate Hike)

बाजार समितीत खरेदी केलेला शेतमाल मुंबई, गुजरात अहमदाबादकडे पाठविला जातो. काही प्रमाणात स्थानिक विक्रीसाठी व्यापारी तो खरेदी करत असतात. पालेभाज्या व फळभाज्यांची आवक सद्यःस्थितीत सुमारे चाळीस ते पन्नास टक्क्यांनी घटली आहे. यामुळे दर वधारले असून, स्थानिक पातळीवर होणारी विक्री किंमत वाढली आहे.

फळभाज्यामध्ये सध्या काकडी व घेवडा यांची आवक अधिक आहे. त्यामुळे या दोन्ही फळभाज्यांचे दर आवाक्यात आहेत. मात्र, दुधी भोपळा, कारली, दोडका, गिलके आदी फळभाज्यांची आवक घटली आहे.

फळभाज्यांचे दर

नाशिक बाजार समितीत सोमवारी (ता. २५) काकडी ८ ते १५ रुपये किलो, दुधी भोपळा १२ ते २० रुपये किलो, गिलके १२ ते २० रुपये किलो, दोडका १५ ते ३५ रुपये किलो, कारले ४५ ते ५५ रुपये किलो, शिमला मिरची ५५ ते ६० रुपये, हिरवी मिरची ५५ ते ६० रुपये असे दर मिळत आहेत. किरकोळ विक्रेत्यांकडे हेच दर ८० ते १०० रुपये प्रतिकिलोपर्यंत पोहोचले आहेत. (latest marathi news)

पालेभाज्यांचे दर

गावठी कोथिंबीर १० ते ३३ रुपये जुडी, मेथी १० ते २५ रुपये जुडी, शेपू ५ ते १५ रुपये जुडी, कांदापात ३५ ते ४८ रुपये जुडी असे भाव मिळत आहेत. तेच किरकोळ बाजारात कोथिंबीर, मेथी, शेपू, कांदापात यांची जुडी छोटी करून दुपटीने विक्री होत आहे.

लिंबू खातोय भाव

यंदा मार्चमध्येच उन्हाचा जोरदार तडाखा वाढला आहे. या उन्हामुळे बाजारात लिंबांची मागणी प्रचंड वाढली आहे. किरकोळ बाजारात पाच रुपयांना एक, तर १५० रुपये प्रतिकिलोप्रमाणे लिंबांची विक्री होत आहे.