Nashik News : खास फॉर्मुल्यामुळे ते बनले ‘भेंडी महाराज’; मित्राच्या गावठी उपायांची गावभर चर्चा

Nashik News : कोणाचे नाव कधी काय पडेल, हे काही सांगता येत नाही. विविध कारणांमुळे अशाप्रकारच्या रंजक नावांचे किस्से हे त्या व्यक्ती व गावाला पडलेल्या नावावरून आपल्याला बघायला व ऐकायला मिळतात. त्यामागे तशी गमतीशीर कहाणीदेखील असते. असाच काहीसा किस्सा नुकताच एका परिसरात घडला आणि त्यामुळे समोरच्या व्यक्तीस ‘भेंडी महाराज’ असे नाव पडले.

एका विशिष्ट वयानंतर माणूस जेव्हा विविध समस्यांनी त्रस्त झालेला बघायला मिळतो. ती समस्या त्याच्यासाठी ‘जगाचा ताप’ ही ठरते असे म्हणतात. तेव्हा त्याचे डॉक्टरांकडे चकरा मारण्याचे प्रमाण वाढल्याचे बघायला मिळते आणि जेव्हा तेथेही त्याचे समाधान होत नाही. तेव्हा तो अखेर आपल्या जवळच्या जिगरी मित्रांचे सल्ले घेण्यास सुरवात करतो.

अशाच एका वय झालेल्या व्यक्तीने आपल्यापेक्षा कमी वयाच्या मित्राकडे कोणाला काही एक न सांगण्याच्या बोलीवर त्याचा खाजगीतील प्रॉब्लेम कसाबसा लाजेकाजे एकदाचा कथन केला. विशेष म्हणजे या मित्राकडे अनेक फॉम्युला आहेत, जे बहुतांश खरे ठरलेले आहेत. त्यावर त्या मित्र महोदयांनी त्यास कच्ची भेंडी खाण्याचा स्वस्तातील ‘गावठी’ उपाय सुचवला. (latest marathi news)

त्यावर त्या व्यक्तीनेही कुठलाही मागचा पुढचा विचार न करता लागलीच त्यावर अंमलबजावणी करण्याचे ठरविले. मित्राच्या गाडीत असलेल्या पाच कच्या भेंड्या त्याने लागलीच खाल्या. आश्चर्य म्हणजे सकाळी त्या ज्येष्ठ मित्राने समोरच्या मित्रास फोन केला. दिलेला फॉर्म्युला सक्सेसफुल झाला की राव, असं म्हणत हर्षोल्हासाने त्याच्यावर अभिनंदनाचा वर्षाव केला.

नेमका तो आलेला फोन स्पीकरवर असल्यामुळे समोर बसलेल्या मित्रांनी तो ऐकला. मग काय सांगता दिवसभरात या भेंडी फॉम्युलाची चर्चा अख्खा गावभर पसरली आणि सर्वांनी पोट धरून धरून खदाखदा असण्याचा आनंद लुटला. ज्या मित्राने हा गावठी फॉम्युला सांगितला, त्या मित्राला आता सर्वजण ‘भेंडी महाराज’ म्हणून संबोधू लागले आहेत.