Nashik Viral Infection Disease: हर घर सर्दी, खोकला तापाचे रुग्ण! बदलत्या वातावरणामुळे रुग्णसंख्येत वाढ

इगतपुरी : गेल्या आठवड्यापासून तापमानाचा पारा खालीवर सरता राहिला. हवेत गारवा व अंगाला झोंबणारी थंडीची तीव्रता जाणवू लागली आहे.

सतत बदलणाऱ्या वातावरणामुळे तालुक्याच्या अनेक भागांत हुडहुडी भरत आहे. रोगट वातावरणामुळे रुग्णसंख्येत वाढ झाली आहे. (Nashik Viral Infection Disease Cold cough and fever patients in every house Increase in number of patients due to changing environment)

सध्या अनेक गावांमध्ये हर घर सर्दी, खोकला, ताप, अपचनाचा त्रास, हात-पाय दुखणे, अशा आजारांचा सामना करावा लागत आहे. दुपारी कडक ऊन, तर सकाळी आणि सायंकाळी गारवा जाणवत असल्याने आजार बळावत आहेत.

विशेषत: रोगप्रतिकारशक्ती कमी असलेली लहान मुले, ज्येष्ठ नागरिक, गरोदर महिलांना वातावरणाचा त्रास होत आहे. सर्दी, खोकला आणि तापाच्या आजारांचे रुग्ण वाढल्याचे डॉक्टरांनी सांगितले.

त्यातच कोरोनाचा नवीन आलेल्या व्हेरिएंट व त्याच्या संसर्गाची भीती निर्माण झाली आहे. नागरिकांनी रोग प्रतिकारक क्षमता वाढविणारी जीवनशैली जपावी, असा सल्ला डॉ. स्वाती गाडे यांनी दिला आहे. सकाळी धुके व गारवा, तर दुपारी उन्हाचा तडाखा बसत आहे.

ढगाळ वातावरणाने धास्तावला बळीराजा

तालुक्यात ढगाळ वातावरणामुळे शेतकऱ्यांची धावपळ होत आहे. दोन महिन्यांपूर्वी अवकाळी पाऊसामुळे भात शेतीचे नुकसान झाले असून, काही भागात भाताच्या शेतात अद्यापही ओलावा आहे.

आता चितेंचे ढग गडद झाले आहेत. भाजीपाला व इतर पिकांचा हातातोंडाशी आलेला घास हिरावण्याची शक्यता व्यक्त होत आहे. त्यामुळे नुकसानीच्या भितीने बळीराजा आधिक प्रमाणात धास्तावला आहे.