Nashik Winter Update: थंडीची चाहूल; उबदार कपड्यांना मागणी

जुने नाशिक : थंडीची चाहूल लागताच विविध प्रकारच्या उबदार कपड्यांना मागणी वाढली आहे. रविवार सुटीचे औचित्य साधन नागरिकांनी स्वेटर, जॅकेट यांसह अन्य उबदार कपडे घेण्यास शालिमार, तसेच तिबेटियन मार्केट येथे गर्दी केली होती. (Nashik Winter Update Cold weather Demand for warm clothes)

गेल्या काही दिवसांपासून शहरात रात्रीच्या सुमारास थंडी जाणवू लागली आहे. दोन दिवसांपासून शहरात असलेल्या ढगाळ वातावरणामुळे वातावरणात गारवाही वाढला आहे. थंडीपासून बचावासाठी उबदार कपड्यांची मागणी वाढली आहे.

दिवाळीच्या सुट्या आणि दोन दिवसांपासून थंडीचे वाढलेले प्रमाण यामुळे गेल्या दहा ते बारा दिवसांपासून उबदार कपड्यांची सतत विक्री होताना दिसून येत आहे. सुमारे ३० ते ४० टक्के विक्री होत असल्याचे विक्रेत्यांकडून सांगण्यात आले.

पुढील दिवसांमध्ये थंडी वाढण्याची शक्यता असल्याने उबदार कपड्यांच्या मागणीतही वाढ होणार असल्याचेही विक्रेत्यांनी सांगितले. उलनमध्ये फॅशनेबल आलेल्या स्वेटरला अधिक मागणी आहे.

महिला आणि लहान मुलांच्या उबदार कपड्यांची अधिक प्रमाणात खरेदी होत असल्याचेही त्यांनी सांगितले. जॅकेट, बटर, लुधियाना, लाँग असे अनेक प्रकारचे स्वेटर विक्रीस उपलब्ध झाले आहेत.

त्याचप्रमाणे लहान मुलांचे स्वेटर, कानटोपी, हातमोजे, पायमोजे, मफलर आदी उबदार कपड्यांची विक्री होत आहे. ३०० रुपयांपासून ते एक हजार रुपयांपर्यंत स्वेटर, तर एख हजार रुपयांपासून पाच हजार रुपयांपर्यंत लेदर जॅकेट विक्रीस उपलब्ध आहेत.

वातावरणाचा व्यवसायावर परिणाम

सध्या वातावरण स्थिर नसल्याने थंडीच्या दिवसांत कडक ऊन जाणवत असून, अचानक पाऊस कोसळत आहे. पावसामुळे बाजारात शुकशुकाट पसरला आहे. व्यावसायिकांनाही दुकान वाढवून घेण्याची वेळ आली आहे.

शिवाय थंडीच्या दिवसात कडाक्याचे ऊन पडत असल्याने उबदार कपडे विक्रीचे प्रमाण कमी झाले होते. एकूणच निश्चित वातावरण नसल्याने व्यवसायावर परिणाम झाल्याचे व्यावसायिकांनी सांगितले.

"गेल्या दहा ते बारा दिवसांपासून उबदार कपडे विक्रीस प्रतिसाद मिळत आहे. दहा ते वीस टक्क्यांनी दरात वाढ झाली आहे. महिला आणि लहान मुलांच्या कपड्यांना अधिक मागणी आहे."

-अजहर सय्यद, विक्रेता

उबदार कपड्यांचे प्रकार दर

स्वेटर ------------------ ३०० ते ६००

लाँग स्वेटर ---------------- ४०० ते ६५०

शिवलेस स्वेटर -------------- ३००

लेदर जॅकेट --------------- ५०० ते पाच हजार

टर्किस स्वेटर ------------------ ४५०

साधी कानपट्टी --------------३० ते ६०

लहान मुलांसाठी कार्टून कानपट्टी ----- ६० ते १२०

कानटोपी ------------------३० ते ३००

हातमोजे -------------------३० ते १५०

पायमोजे ----------------------२० ते १००

मफलर ----------------------१२० ते ३००