Nashik Winter Update: थंडीची लागली चाहूल; पाऱ्यात होणार घसरण

Nashik Winter Update : तापमानातील चढ-उतारानंतर आगामी आठवड्यापासून पाऱ्यात घसरण होण्याचा अंदाज हवामानखात्‍याने वर्तविला आहे.

त्‍यामुळे थंडीची चाहूल लागली असून, पाऱ्यात घसरण होण्यास सुरवात होणार आहे. बुधवारी (ता. ८) नाशिकचे किमान तापमान १७.२ अंश सेल्सिअस तर कमाल तापमान ३१.७ अंश सेल्सिअस नोंदविले आहे. (Nashik Winter Update Cold weather sets in)

काही दिवसांपूर्वी नाशिकचे किमान तापमान १४.५ अंश सेल्सिअसपर्यंत खालावले होते. परंतु त्‍यानंतरच्‍या कालावधीत ढगाळ वातावरण व इतर विविध कारणांमुळे किमान तापमानात किरकोळ वाढ झालेली आहे.

हवामान खात्‍याच्‍या अंदाजानुसार आगामी आठवड्याभरात नाशिकचे किमान तापमान घसरून १३ अंश सेल्सिअसपर्यंत पोचण्याची शक्‍यता आहे, तर कमाल तापमान ३१ अंश सेल्सिअसच्या सुमारास राहण्याचा अंदाज आहे.

त्‍यामुळे दिवसाच्‍या वेळी तप्त ऊन आणि सायंकाळनंतर वातावरणात शीतलहरींचा सामना नाशिककरांना करावा लागण्याची शक्‍यता आहे. यंदाच्‍या हंगामात अद्याप कडाक्‍याची थंडी पडलेली नसून, दिवाळीनंतर थंडीचा तडाखा वाढण्याचा अंदाजदेखील वर्तविला जात आहे.