Nashik Winter Update: गार वाऱ्यामुळे थंडीची जाणवतेय तीव्रता!

नाशिक : एकीकडे पाऱ्यात चढ-उतार सुरू असताना, दुसरीकडे वातावरणात असलेल्‍या गार वाऱ्यामुळे थंडीची तीव्रता जाणवत आहे.

रविवारी (ता. ३) दुपारनंतर शहरात काही प्रमाणात ढगाळ वातावरण राहिले; परंतु यासोबत कमालीचा गारठादेखील जाणवत होता. किमान तापमान १९.६ अंश सेल्सिअस, तर कमाल तापमान ३०.४ अंश सेल्सिअस नोंदविले गेले. (Nashik Winter Update Due to wind intensity felt cold)

ऑक्‍टोबरच्‍या शेवटच्‍या आठवड्यात वातावरणात निर्माण झालेली थंडी नंतर अचानकपणे गायब झालेली होती. काही दिवसांपूर्वी अवकाळी पावसाने झोडपल्‍यानंतर वातावरणात पुन्‍हा एकदा थंडी जाणवू लागली आहे.

यादरम्‍यान पाऱ्यात सातत्‍याने चढ-उतार सुरू आहे. किमान तापमान सरासरी २० अंश, तर कमाल तापमान सरासरी ३० अंशांच्‍या जवळपास राहात असले तरी वातावरणात वाहत असलेल्‍या जोरदार गार वाऱ्यामुळे गारठा अधिक प्रमाणात जाणवत असल्‍याचा अनुभव नाशिककरांना येतो आहे.

रविवारीदेखील काही भागात ढगाळ वातावरण राहिले; परंतु त्‍याचा थंडीवर फारसा परिणाम झाला नव्‍हता.

पहाटेच्‍यावेळी धुक्‍याची दुलई

दिवसा सौम्‍य स्वरूपात उन्हाचा अनुभव सध्या येत असला तरी पहाटेपासून वातावरणात धुक्‍याची दुलई पसरत आहे.

तर काही भागांमध्ये ओस पडत असल्‍याचेही बघायला मिळते आहे. वाढत्‍या थंडीसोबत धुक्‍यात वाढ होण्याचा अंदाज आहे.

सर्दी‍सह साथीच्‍या आजारांमध्ये वाढ

सध्याच्‍या विषम स्‍वरुपातील वातावरणामुळे आरोग्‍याचा प्रश्‍न निर्माण झालेला आहे. अनेक नागरिकांना सर्दी-खोकल्यायच्‍या सौम्‍य तक्रारीसह अंगदुखी, ताप व इतर संसर्गजन्‍य आजारांचे प्रमाण वाढले आहे.

अशा परिस्‍थिती नागरिकांनी आरोग्‍याची काळजी घेण्याचा सल्‍ला तज्‍ज्ञांकडून दिला जातो आहे. विशेषतः श्‍वसनाचे विकार असलेल्‍या रुग्‍णांनी अधिकची खबरदारी घ्यावी, असा सल्‍ला दिला जातो आहे.

आठवडाभरातील तापमानाची स्‍थिती अशी- (अंश सेल्सिअसमध्ये)

तारीख किमान कमाल

२६ नोव्‍हेंबर २०.४ २८

२७ नोव्‍हेंबर १८.४ २२.९

२८ नोव्‍हेंबर १९.० २८.७

२९ नोव्‍हेंबर १९.६ २८.५

३० नोव्‍हेंबर १७.७ २८.९

१ डिसेंबर १७.९ २९.१

२ डिसेंबर १९.२ २९.२

३ डिसेंबर १९.६ ३०.४