Nashik ZP Sport Competition : कर्मचारी क्रीडा स्पर्धा निधीत तिपटीने वाढ; जि.प. अध्यक्ष चषक स्पर्धेला मात्र ठेंगा

Nashik ZP Sport Competition : जिल्हा परिषदेच्या अधिकारी, कर्मचारी यांच्या क्रीडा स्पर्धा व सांस्कृतिक कार्यक्रमांसाठी असलेल्या निधीत तीन वर्षांत तिपटीने वाढ झाली आहे. गतवर्षी या स्पर्धांसाठी केलेली १८ लाखांची तरतूद, यंदाच्या अंदाजपत्रकात थेट २५ लाख केली आहे. या क्रीडा स्पर्धेच्या रकमेत वाढ करताना दुसरीकडे जि.प. अध्यक्ष चषक स्पर्धेच्या निधीत कोणतीही वाढ झालेली नाही. (Nashik ZP Sport Triple increase in employee sports competition fund marathi news)

त्यामुळे प्रशासनाचा प्राधान्यक्रम नेमका कोणता, असा प्रश्‍न उपस्थित होत आहे. ग्रामीण भागातील विद्यार्थ्यांच्या कला, गुणांना वाव मिळावा यासाठी जिल्हा परिषदेमार्फत दरवर्षी जिल्हा परिषद अध्यक्ष चषक स्पर्धा होते. या स्पर्धांसाठी अंदाजपत्रकात प्राथमिक शिक्षण विभागांतर्गत निधीची तरतूद केली जाते. (latest marathi news)

आजवर या स्पर्धेतून जिल्हा, राज्यस्तरीय खेळाडू तयार झाले आहेत. त्यामुळे पदाधिकारी, सदस्य या स्पर्धेसाठी निधीच्या तरतुदीत वाढ करतात. प्रशासकीय राजवट असल्याने गत तीन वर्षांपासून या स्पर्धेसाठी २० लाखांची तरतूद केली जात आहे. यात कोणतीही वाढ झालेली नाही.

याउलट, जि. प. अधिकारी, कर्मचारी यांच्या स्पर्धेसाठी असलेल्या तरतुदीत प्रशासनाकडून भरघोस वाढ केली जात आहे. पुढील वर्षी होणाऱ्या स्पर्धेसाठी सन २०२४-२५ च्या अंदाज पत्रकात तब्बल २५ लाख रुपयांची तरतूद केली आहे. त्यामुळे तीन वर्षांत या निधीच्या तरतुदीत मोठी वाढ झाली आहे. विद्यार्थ्यांचा सहभाग असलेल्या अध्यक्ष चषक स्पर्धेसाठी निधीत वाढ नसल्याने नाराजी व्यक्त होत आहे.