SSC Result: मैदानावर सराव, अन् मैदानावरच अभ्यास; राष्ट्रीय खो-खोपटू चमकले

नाशिक : कुठलीही शिकवणी न लावता मैदानावर खो- खो सराव करताना मिळेल तेव्‍हा अभ्यास सुरु ठेवला. सकाळ व सायंकाळच्‍या सत्रात सरावानंतर अभ्यासासाठी आवर्जून वेळ दिला. या माध्यमातून प्रबोधिनीच्‍या खेळाडूंनी (Kho Kho Players) हसत खेळत दहावीची परीक्षा दिली. नुकताच जाहीर झालेल्‍या निकालात (SSC Results) या खेळाडूंनी घवघवीत यश संपादन केले आहे. (national Kho Kho players shine in SSC exams Nashik News)

या खेळाडूंनी तर अगदी निरागसपणे परीक्षेचा सामना केला. सोबत त्‍यांच्‍या पालकांचीदेखील कमाल राहिली. आपल्‍या पाल्‍याची दहावीची परीक्षा आहे म्‍हणून ना कुठल्‍या पालकाने महिन्‍याभराची रजा टाकली ना या मुलांना महागडे क्‍लास लावले. मुक्‍तछंदपणे आपल्‍या पाल्‍याला खेळात लक्ष केंद्रित करू देत मोकळीक दिली. या खेळाडूंनीदेखील खेळा इतकीच अभ्यासावर निष्ठा ठेवताना परीक्षेत घवघवीत यश मिळविले आहे. प्रबोधिनीच्‍या राष्ट्रीय खेळाडू सरीता दिवा (७२. ६०), निशा वैजल (८१), सोनाली पवार (७६. २०) यांच्‍यासह दीदी ठाकरे (८१. ४०), ऋतुजा सहारे (७७), ज्योती मेढे (६७. ८०), दीक्षा सिताड (६९. ८०), जना घुटे (६०. ६०) यांनी यशस्‍वी कामगिरी केली आहे. या यशस्‍वी खेळाडू विद्यार्थ्यांचे अभिनंदन नाशिक जिल्हा खो- खो असोसिएशन, संस्कृती नाशिक आणि समर्पण संस्‍थेच्‍या पदाधिकाऱ्यांनी केले आहे.