...हा तर एप्रिल फूल करण्याचा प्रयत्न!

सटाणा (जि. नाशिक) : येथील माजी नगराध्यक्ष सुनील मोरे यांनी गेल्या १ मे २०२१ रोजी महाराष्ट्रदिनी सटाणा शहराला पुनंद धरणाचे पाणी देण्याची घोषणा केली होती. ती हवेतच विरली आणि आता पालिकेत प्रशासक असताना शहराला पाणीटंचाई भासल्यास शहराला पुनंद धरणाचे पाणी द्यावे, अशी केविलवाणी मागणी ते करीत आहेत. हा फक्त दिखाऊपणाचा एक भाग असून, शहरवासीयांना एप्रिल फुल बनविण्याचा डाव आहे का, असा थेट प्रश्‍न राष्ट्रवादी कॉंग्रेसचे शहर कार्याध्यक्ष मनोज सोनवणे व सरचिटणीस नितीन सोनवणे यांनी पत्रकाद्वारे उपस्थित केला आहे.

पत्रकात म्हटले आहे...

श्री. मोरे नगराध्यक्ष असताना गेल्या तीन वर्षांपासून पुनद पाईपलाईनचे काम चालू आहे. अध्यक्षपदाचा कार्यकाळ संपण्याआधीच घाईघाईत जलपूजन केले. पुनंद योजनेचे काम आजही अपूर्ण आहे. मग, गेल्यावर्षी १ मेला पाणी देण्याचे आश्‍वासन कोणत्या आधारावर दिले. न्यायालयाचे आदेश धाब्यावर बसवून तीनवेळा ठेकेदारांना मुदतवाढ देऊनही नगराध्यक्षपदी असेपर्यंत शहरवासीयांना पुनंदचे पाणी देऊ शकले नाहीत, हे मोरे यांचे मोठे अपयश असल्याचा ठपकाही पत्रकात ठेवण्यात आला आहे. पालिकेत प्रशासन बसले तेव्हाच मोरे यांना शहरात पाणीटंचाई का दिसू लागली, आपले अपयश झाकण्यासाठी शहरातील पाणीटंचाईचे खापर पालिका प्रशासनावर फोडण्याचा केविलवाणा प्रयत्न श्री. मोरे करीत आहेत. पुनंदचे काम पूर्ण झालेले नसताना प्रशासनाला टंचाईकाळात पुनंदचे पाणी शहरवासीयांना देण्याचा सल्ला म्हणजे जनतेची दिशाभूल असल्याचा आरोपही श्री. सोनवणे द्वयींनी केला आहे.