गोदावरीत पाणी कमी, पाणवेलीच जास्त

नाशिक : गोदावरीचे प्रदूषण रोखण्यासाठी पर्यावरणप्रेमीतर्फे सुरू असलेल्या निर्मलवारी उपक्रमात सोमवारी (ता.३१) सायखेडा (नाशिक) ते कोपरगाव (नगर) दरम्यान पाहणीत नदीपात्रात पाणी कमी, पाणवेलीच जास्त असे चित्र अनुभवास मिळाले. निर्मलवारी गोदावारी व गोदावरी परिवाराचे निशिकांत पगारे, योगेश बर्वे, राजू शिरसाट व डॉ. प्रभाकर वडजे आदी पदाधिकाऱ्यांनी दौरा केला. (pollution and panweli issue in godavari river nashik)

सायखेडा ते चास (नळी) (ता. कोपरगाव, जि. नगर) पर्यंत चाललेल्या दुसऱ्या टप्प्यात प्रथम दौऱ्यातील ओढा, लालपाडी, सायखेड्यातील तीच अवस्था पुढे करंजगाव ते थेट नांदूरमध्यमेश्वर धरणापर्यंत गोदावरीत वेलींचा जंजाळ पाहायला मिळाला. धरणात अडकून पडलेल्या वेलीच्या पुढे खेडलेजवळून वाहणाऱ्या गोदावरीचे स्वरूप बरे असले तरी, चास नळी गावी गोदावरीची नाशिकमधील दूषित पाणी पुढे गेल्याने तेच पाणी जनावरे, माणसांना प्यावे लागते. वारंवार पाठपुरावा करूनही नदी स्वच्छतेसाठी निधी मिळत नसल्याच्या तक्रारी आहेत.

पाटबंधारे व जलसिंचन विभागाकडे निधी नसल्याने पदरमोड करून नदीची स्वच्छता करावी लागत असल्याचे अधिकारी, ग्रामस्थ, पदाधिकारी यांच्या तक्रारी असल्याचे ग्रामस्थांनी सांगितले. नांदूरमध्यमेश्वरपर्यंत नदी दूषित होण्याचे प्रमाण बघण्यात आले. गोदावरी नदीपात्रावरील वेलीच्या थराबाबत जिल्हा परिषदेकडे पाठपुरावा करण्याचे ठरले.