..तर सिटी लिंक वाहकांना करणार बडतर्फ!

नाशिक : सिटी लिंकच्‍या (Citylinc) माध्यमातून बस वाहतूक (Bus Travel) सेवा सुरू झाल्यापासून आत्तापर्यंत १५१ वाहकांना दंड (Penalty) झाला आहे. ६१ वाहकांना कमी केलेले आहे. वाहकाकडून तिसऱ्यांदा चूक घडल्‍यास त्‍यांना सेवेतून काढण्याची तरतूद आहे. यापुढे केवळ सेवा कमी न करता संबंधितावर गुन्हा दाखल करण्याचे निर्देश प्रशासक महापालिका आयुक्त रमेश पवार (NMC Ramesh Pawar) यांनी दिले आहे. (NMC Commissioners warning in City Linc meeting Nashik News)

सिटीलिंक अधिकाऱ्यांसोबत झालेल्‍या बैठकीत विविध मुद्यांवर चर्चा झाली. याप्रसंगी महानगर शहर बस वाहतूक सेवेचे मुख्य कार्यकारी अधिकारी शिवाजी चव्हाणके, महाव्यवस्थापक मिलिंद बंड आदी उपस्थित होते. नागरिकांच्या सेवेसाठी तोट्याचा विचार न करता कर्तव्‍य म्‍हणून बससेवा चालवते. कर्मचाऱ्यांकडून चांगल्‍या पद्धतीने सुविधा देणे अपेक्षित आहे. कर्मचाऱ्यांकडून चुका होऊ नये, यासाठी तरतूदी आहेत. यासर्व बाबींचा आढावा आयुक्‍त रमेश पवार यांनी घेतला.

६१ वाहकांची सेवा समाप्त

बससेवेमध्ये काही वाहक प्रवाशांकडून पैसे घेतात, मात्र त्यांना तिकीट देत नाही अशा काही तक्रारी प्राप्त झाल्या. या बाबत पहिली चूक आढळल्यास वाहकाला समज देण्यात येते. दुसऱ्यांदा चूक झाल्यास दंडात्मक कारवाई तर तिसरी चूक मात्र सदर वाहकाची सेवा समाप्त होते. यापुढे मात्र सेवा कमी करण्यावर न थांबता संबधितांवर गुन्हा दाखल होणार आहे.

विद्यार्थी पासचे नियोजन करा

प्रवासी संख्या अधिक असलेल्‍या मार्गांवर जादा बस सेवा सुरु कराव्‍या. प्रतिसाद नसलेल्‍या मार्गांवरील बसच्‍या फेऱ्या कमी करण्याचा निर्णय यावेळी घेतला. शहरात सध्या २१० बस सुरू असून १२ जूननंतर शाळा खुल्‍या होणार आहेत. यावेळी तीस बस सुरू करण्यात येणार आहेत. तर दहा बस राखीव ठेवल्‍या जाणार असून एकूण २४० बस नियमित धावणार आहेत. अशी व्यवस्था करण्याचे निर्देशही बैठकीत दिले.