NMC News: कुष्ठरुग्ण, क्षयरूग्ण शोधमोहिम धोक्यात

नाशिक : गेल्या काही दिवसात महापालिकेत विभागांतर्गत मोठ्या प्रमाणात बदल्या झाल्याने त्यातून नाराजीचे फटाके फुटत आहे. वैद्यकीय विभागाकडून केंद्र सरकारच्या सूचनेवरून क्षयरोग व कुष्ठरोग शोधमोहिमेच्या सूचना देण्यात आल्या.

परंतु, वैद्यकीय विभागात मोहीम राबविण्यासाठी अधिकारीच नसल्याची बाब समोर आली असून, यासंदर्भात आयुक्त डॉ. अशोक करंजकर यांच्याकडे परिस्थिती कथन केल्यानंतर तातडीने कारणे दाखवा नोटीस बजावण्याच्या सूचना दिल्या. (NMC News Leprosy Tuberculosis research mission in jeopardy nashik)

महापालिकेत नगररचना, बांधकाम, विद्युत, पाणीपुरवठा, ड्रेनेज विभागात मोठ्या प्रमाणात फेरबदल करण्यात आले. त्याचा परिणाम मोठ्या पदांवर जे बसले त्यांच्यात समाधानाचे वातावरण असले तरी नाराजांची नाराजी अद्यापही दूर झालेली नाही.

वैद्यकीय विभागात क्षयरोग, कुष्ठरोग विभागाचा कार्यभार असलेले डॉ. आवेश पलोड यांची बदली आरोग्य संचालक पदावर करण्यात आली. यापूर्वी या पदावर कार्यरत असलेल्या डॉ. कल्पना कुटे यांच्याकडे कुष्ठरोग व क्षयरोग विभागाचा कार्यभार देण्यात आला.

परंतु अद्यापही डॉ. कुटे यांनी पदभार स्वीकारलेला नाही. त्यात केंद्र सरकारकडून कुष्ठरोग व क्षयरोगींचे सर्वेक्षण करण्याच्या सूचना देण्यात आले.

परंतु अधिकारीच नसल्याने कामाला सुरवात झालेली नाही. या विभागाकडे चार कर्मचारी आहे. त्यांना देखील कुठल्या प्रकारच्या सूचना नसल्याने महापालिका हद्दीत शोधमोहीम धोक्यात आली आहे.