नाशिक : दसऱ्यानिमित्त उजळली सोन्याची बाजारपेठ

नाशिक : विजयादशमी पूर्वसंध्येला नागरिकांनी सोने, चांदी दागिने खरेदीसाठी चांगलीच गर्दी केली. नागरिकांनी दागिने खरेदीला चांगला प्रतिसाद दिल्याने सोन्याची बाजारपेठ उजाळून निघाली. राज्यात कोरोना महामारीमुळे गेल्या दीड वर्षापासून सोने- चांदीच्या बाजारपेठेत अपेक्षेप्रमाणे नागरिकांचा प्रतिसाद मिळत नव्हता. मात्र, चालू हंगामात कोरोनाचे कमी झालेले प्रमाण, सोन्याच्या दरात झालेली कमालीची घसरण यामुळे विजयादशमी पूर्वसंध्येला नाशिककरांनी सोने खरेदीचा मुहूर्त साधत सोने, चांदीच्या दुकानांमध्ये चांगलीच गर्दी केली.

दसऱ्यानिमित्त प्रथमच नागरिकांकडून चांगला मिळत प्रतिसाद मिळाल्याने सराफांकडून जय्यत तयारी करण्यात आली होती. विजयादशमी मुहूर्तावर मंगळसूत्र, हार, बिस्कीट, अंगठी, बांगड्या, कानातले दागिने यांना खास करून मागणी होत होती. तसेच, चांदीचे नवनवीन अलंकार, पूजेची भांडी, हिऱ्यांचे दागिनेदेखील महिलांचे लक्ष वेधून घेत होते.

१० ते ५० टक्के सूट

कोरोनानंतर प्रथमच विजयादशमीनिमित्त सोने, चांदी खरेदीसाठी बाजारपेठेत नागरिकांनी चांगली गर्दी केली होती. दसऱ्यानिमित्त ग्राहकांनादेखील आपल्याकडे आकर्षित करण्यासाठी सराफांकडून दागिन्यांच्या घडणावळीवर सुमारे दहा ते ५० टक्के सूट देण्यात येत आहे. तसेच, चांदीच्या दागिन्यांवरदेखील आकर्षक भेट वस्तू दिल्या जात आहे.

नवरात्रीच्या सुरवातीपासून सोने, चांदी खरेदीसाठी नागरिकांचा चांगला प्रतिसाद मिळत आहे. कोरोना पार्श्‍वभूमीवर सर्व नियमांचे पालन केले जात आहे.
- स्वाती जाधव, व्यवस्थापक, पू. ना. गाडगीळ ॲन्ड सन्स, नाशिक