भाजपला बेशिस्तपणाचे ग्रहण; मंचावरील गर्दीने भडकल्या पंकजा मुंडे!

सिडको (नाशिक) : भाजपकडून आयोजित करण्यात आलेल्या कार्यक्रमात बेशिस्तपणाचा कळस आढळून आला. नियोजनाअभावी मंचावर प्रचंड गर्दी झाल्याने स्वतः माजीमंत्री पंकजा मुंडे यांनीच हातात माईक घेऊन गर्दी कमी करण्याचे फर्मान सोडले. त्यामुळे भाजपच्या कार्यक्रमाचे एकप्रकारे हसू झाले.

शिस्तप्रिय पक्ष असलेल्या भाजपमध्ये बेशिस्तपणा आढळून आला. सर्व गर्दी पाहून कोरोना पळाला की काय, असा प्रश्न उपस्थित केला गेला. कार्यक्रमाच्या ठिकाणी शासनाचे सर्वच नियम पायदळी तुडविले गेले. महापौर यांच्या व्यतिरिक्त कुणीही मास्क घातलेला नव्हता हे विशेष. एकीकडे सर्वसामान्य नागरिकांवर कारवाई, तर दुसरीकडे राजकीय नेत्यांकडे काणाडोळा करत असलेल्या अंबड पोलिसांच्या समोरच हा प्रकार दिसून आल्याची उपस्थितांमध्ये चर्चा होताना दिसून आली. खुर्चीसाठी नाही तर समाजासाठी राजकारण करावे, असे आवाहन माजी मंत्री पंकजा मुंडे यांनी कार्यक्रमात मार्गदर्शन करताना केले.