PESA Teacher Recruitment : पेसा शिक्षक भरतीसाठी समांतर आरक्षण जाहीर; शिक्षकांच्या जि. प. वर धडकेनंतर कार्यवाही

PESA Teacher Recruitment : जिल्हयातील आदिवासी तालुका (पेसा) क्षेत्रातील शिक्षक पदभरतीच्या जाहीर झालेल्या वेळापत्रकात शिक्षक भरतीचे समांतर आरक्षण जाहीर केलेले नव्हते. त्यामुळे संतप्त झालेल्या पेसा शिक्षकांनी शुक्रवारी (ता.१५) जिल्हा परिषदेला धडक देत विचारणा केली.

त्यानंतर शिक्षण विभागाने तत्काळ समांतर आरक्षण जाहीर केले. जिल्हा परिषदेच्या बेवसाईटवर हे आरक्षण टाकण्यात आलेले आहे. कोणीही संभ्रम निर्माण करू नये असे आवाहन प्राथमिक शिक्षणाधिकारी नितीन बच्छाव यांनी केले. (Parallel reservation announced for PESA teacher recruitment nashik news)

जिल्हयातील आदिवासी तालुका (पेसा) क्षेत्रातील शिक्षकपद भरतीस शासनाने परवानगी दिल्यानंतर, जिल्हा परिषदेच्या प्राथमिक शिक्षण विभागाने भरती प्रक्रीया सुरू केली आहे. राज्यस्तरावरून शिक्षकांची यादी प्राप्त झाली असून, पडताळणी वेळापत्रक विभागाने जाहीर केले आहे.

त्यानुसार, यादीची शनिवारी (ता.१६) व रविवारी (ता.१७) पडताळणी केली जाणार आहे. गुणवत्ता यादी व कागदपत्रे पडताळणी वेळापत्रक नाशिक जिल्हा परिषदेच्या वेबसाइटवर प्रसिध्द देखील करण्यात आले.

मात्र, यात शिक्षकांचे समांतर आरक्षण जाहीर केलेले नव्हते. तसेच कोणत्या विषयांसाठी नेमके किती शिक्षकांची नियुक्ती होणार याबाबतची माहिती नसल्याने पेसा क्षेत्रातील व यादीत नावे असलेल्या शिक्षकांनी जिल्हा परिषदेवर शुक्रवारी धडक मारली.

हेही वाचा : Credit Card फसवणूक....काय घ्याल काळजी?

यावेळी शिक्षकांच्या शिष्टमंडलाने थेट मुख्यकार्यकारी अधिकारी आशिमा मित्तल यांची भेट घेत ही बाब निर्देशनास आणून दिली. त्यानंतर श्रीमती मित्तल यांनी लागलीच शिक्षणाधिकारी नितीन बच्छाव यांसह संबंधित अधिका-यांना पाचारण करत विचारणा केली. यात समातंर आरक्षण विभागाने निश्चित करण्यात आलेले आहे.

तसेच विषयानुसार शिक्षकांची संख्या ही कागदपत्रांची पडताळणी झाल्यानंतर निश्चित होणार असल्याचे सांगितले. त्यानंतर शिक्षणाधिकारी बच्छाव यांनी लागलीच समांतर आरक्षण जाहीर केले. उमेदवारांना हे आरक्षण पाहता यावे यासाठी वेबसाईटवर देखील ते प्रसिध्द करण्यात आलेले असल्याचे बच्छाव यांनी सांगितले.