Nashik Rain Update: पुणेगाव धरणात 92 टक्के साठा; ओझरखेड भरण्याच्या आशा पल्लवीत

Nashik Rain Update : येवला व चांदवड तालुक्याला जलसंजीवनी देणारा देवसाने (मांजरपाडा) वळण योजना प्रकल्पाच्या पाणलोट क्षेत्रात पाऊस सुरू आहे. प्रकल्पाच्या कालव्यातून पूर्णक्षमतेने पाणी आल्याने पुणेगाव धरणात ९२ टक्के साठा झाला आहे.

पुणेगाव धरणातून रविवारी (ता. ६) दुपारपासून विसर्ग सुरू केल्याने ओझरखेड धरण भरण्याच्या आशा पल्लवीत झाल्या आहेत. (Rain Update 92 percent storage in Punegaon Dam nashik)

गुजरात राज्य व समुद्रात वाहून जाणारे पाणी गोदावरी खोऱ्यात वळविणारा राज्यातील पहिला प्रकल्प असलेला देवसाने (मांजरपाडा) वळण योजना प्रकल्पांतर्गत असलेल्या ३४५० मीटर लांबीच्या धरणातील पाणलोट क्षेत्रात गेल्या १५ ते २० दिवसांपासून संततधारेने धरणाच्या साठ्यात वाढ होऊन धरणाच्या सुमारे १० किलोमीटर लांबीच्या बोगदा असलेल्या कालव्यातून पाणी वाहू लागले आहे.

कालव्यातील पाणी उनंदा नदीद्वारे पुणेगाव धरणात येऊ लागले. दोन दिवसांत २० टक्क्यांनी वाढल्याने रविवारी पुणेगाव धरण ९२ टक्के भरले. यामुळे धरणातून पाण्याचा विसर्ग सुरू केल्याने उनंदा नदीपात्रातून पाणी ओझरखेड धरणात येऊ लागले आहे.

त्यामुळे तिसगाव धरणापाठोपाठ सर्वांत कमी जलसाठा असलेल्या ओझरखेड धरणाच्या जलसाठ्यात वाढ होऊ लागली आहे.

हेही वाचा : Credit Card फसवणूक....काय घ्याल काळजी?

मांजरपाडा प्रकल्प लाभक्षेत्रात पुढील काही दिवस पावसाचा जोर कायम राहिल्यास ओझरखेड धरणही दहा ते बारा दिवसांत ओव्हरप्लो होण्याच्या आशा पल्लवीत झाल्या आहेत. पुणेगाव धरण भरल्याने दिंडोरी तालुक्यासह येवला, चांदवड, निफाड तालुक्यातील जनतेची चिंता काहीशी दूर होत दिलासा मिळाला आहे.

दिंडोरी तालुक्यातील धरणांचा पाणीसाठा

करंजवन धरण ५० टक्के, पुणेगाव धरण ९२ टक्के, पालखेड धरण ७१ टक्के, वाघाड धरण ६४ टक्के, ओझरखेड धरण ३० टक्के, तीसगाव धरण ० टक्के.