Rajya Natya Spardha 2023: जीवनाचे मोल समजावणारे ‘शरणम् शांती’

जीवनात उद्भवणारे प्रसंग अन् त्यातून आपल्या हातून घडणाऱ्या घटनांच्या पापक्षालनासाठी शांततेचा संदेश देणारी नाट्यकृती ‘शरणम् शांती’ ६२ व्या महाराष्ट्र राज्य हौशी मराठी नाट्य स्पर्धेत मंगळवारी (ता. १२) विजय नाट्य मंडळ संस्थेतर्फे सादर झाले.

सतीश कोठेकर लिखित या नाटकाचे वरुण भोईर यांनी दिग्दर्शन केले. (Rajya Natya Spardha 2023 Sharanam Shanti to teach value of life nashik)

गुरू- शिष्याच्या आयुष्यात येणाऱ्या प्रसंगातून या नाटकाचे कथानक आकार घेते. गुरूंच्या विहारात शिष्य शांती पालनाचे धडे गिरवत असतो. विहारात नैराश्य आलेली मुलगी उपचारासाठी येते. शिष्य तिच्या प्रेमात वाहत जातो.

त्यांच प्रेम यशस्वी होते खरे मात्र उपचारानंतर ती परत जाते. तिच्या जाण्याने शिष्याला विरह सहन होत नाही, तोही विहारातून निघून जातो. काही दिवसांनी पुन्हा विहारात परततो, मात्र त्याच्याकडून मुलीची हत्या होते.

गुरुजी त्याला पापक्षालणसाठी शरण जायला सांगतात. त्याला पोलिस अटक करून घेऊन जातात. इकडे गुरुजींचे निर्वाण होते. तुरुंगवास भोगून आल्यावर गुरुजींची शांती प्रसाराची परंपरा तो स्वीकारतो.

जीवनात शांती प्राप्त करायची असेल तर शराणगतीशिवाय पर्याय नाही हा संदेश नाटकातून प्रेक्षकांपर्यंत पोचतो. नाटकात सरकत अन् फिरणारे नेपथ्य आकर्षणाचा केंद्रबिंदू ठरले. नाटकाच्या कथानकाला साजेसे संगीत होतं.

अस्थेटिक संरचेनेतून हे नाटक प्रेक्षकांसमोर उभे राहत होते, मात्र प्रसंगानुरूप होणारी शांतता समजून घ्यायला प्रेक्षकांना काहीसं अवघड गेले. प्रकाशयोजनेने नाटकाला पेललं असे म्हटलं तर वावगे ठरणार नाही.

कलावंतांनी उत्तम अभिनय साकारला. रुद्र ओहोळ, ज्ञानेश्वर कदम, महेंद्र चौधरी, अमोल थोरात, धनश्री शेळके, पूजा वाघ, हेमंत गव्हाणे, महेश खैरनार, रिषिका सातार्डेकर, सिमर सेठी, ओवी महाले या कलावंतांनी नाटकात भूमिका साकारल्या.

नेपथ्य किरण भोईर तर प्रकाशयोजना कृतार्थ कंसारा यांनी साकारली. सुरेश भोईर यांनी रंगभूषा तर सुरभी आणि संगीता यांनी वेशभूषा साकारल्या.