Nashik : बेशिस्त वाहनचालकांना हिसका; 10 लाखांचा दंड वसूल

नाशिक : जिल्ह्यातील वाढत्या अपघातांच्या पार्श्वभूमीवर नाशिक ग्रामीण वाहतूक पोलिसांकडून बेशिस्तांविरोधात कारवाईचा बडगा उगारण्यात आला आहे. यामुळे जिल्ह्यातील बेशिस्त वाहनचालकांचे धाबे दणाणले आहे. नवनियुक्त पोलिस अधीक्षकांनीही जिल्हा अपघातमुक्त करण्यासाठी ठोस उपाययोजनांसह बेशिस्तांवर दंडात्मक कारवाई करण्याचे संकेत दिल्याने गेल्या चार दिवसांत ग्रामीण वाहतूक शाखेने दहा लाखांचा दंड वसूल केला आहे. (reckless driver 10 lakh fine collected by rural police nashik Latest Marathi News)

नाशिक ग्रामीणचे पोलिस अधीक्षक शहाजी उमाप यांनी पदभार स्वीकारल्यापासून जिल्ह्यातील विविध भागांचा तपशीलवार आढावा घेत आहेत. यात प्रामुख्याने जिल्ह्यातील वाढत्या अपघाती घटनांची माहिती घेतल्यानंतर पोलिस अधीक्षकांनी अपघात रोखण्यासाठीच्या उपाययोजना राबविण्याचे आदेश ग्रामीण वाहतूक शाखेला दिले आहेत. त्याचप्रमाणे, जिल्ह्यात वाहतूक नियमांचे उल्लंघन करणाऱ्या बेशिस्तांविरोधात थेट दंडात्मक कारवाई करण्याचेही आदेश बजावले होते.

त्यानुसार नाशिक ग्रामीण वाहतूक पोलिस शाखेचे पोलिस निरीक्षक देवीदास ढुमणे यांच्या नेतृत्वाखाली वाहतूक शाखेने जिल्हाभर बेशिस्त वाहनचालकांविरोधात दंडात्मक कारवाई सुरू केली आहे. त्यामुळे जिल्ह्यातील बेशिस्त वाहनचालकांचे धाबे दणाणले आहे. गेल्या चार दिवसांत जिल्हाभरात ग्रामीण वाहतूक शाखेने वाहतूक नियमांचे उल्लंघन केल्याप्रकरणी दोन हजार २२३ बेशिस्त वाहनचालकांविरोधात दंडाची कारवाई करीत दहा लाख ९६ हजार ६५० रुपयांचा दंड वसूल केला आहे. यामध्ये प्रवाशांची अवैधरीत्या वाहतूक करणाऱ्या ५६ वाहनांचाही समावेश आहे.

जिल्ह्यातील अपघातांची आकडेवारी

वर्ष प्राणांकित अपघात अपघातातील मृत्यू

२०२१ ७८८ ८६२

२०२२ (ऑक्टोबरपर्यंत) ६९४ ७५२

"रस्त्यावरील प्रवास सुरक्षित व्हावा, यासाठी अपघातांना आळा घालण्यासाठी बेशिस्त, बेजबाबदार व वाहतूक नियमांचे उल्लंघन करणाऱ्यांविरोधात दंडात्मक कारवाईचे आदेश दिले आहेत." - शहाजी उमाप, पोलिस अधीक्षक, नाशिक ग्रामीण