मुंबईच्या धर्तीवर जुन्या इमारतींचा पुनर्विकास

नाशिक : मुंबईच्या धर्तीवर शहरातील ३० ते ४० वर्षे जुन्या इमारतींच्या पुनर्विकासासाठी प्रोत्साहन एफएसआय मिळावा, अशी मागणी शिवसेनेच्या शिष्टमंडळाने नगरविकास मंत्री एकनाथ शिंदे यांच्याकडे केली.

विरोधी पक्ष नेते अजय बोरस्ते, जिल्हाप्रमुख विजय करंजकर, महापालिकेचे गटनेते विलास शिंदे आदींनी मंत्री शिंदे यांची भेट घेतली. शहर विकास नियंत्रण नियमावलीनुसार शहरात अनेक इमारती विकसित करण्यात आल्या. त्यातील अनेक इमारतींचे आर्युमान ३०-५० वर्षे पूर्ण झाले आहे, तर अनेक इमारती मोडकळीस येत असून, धोकादायक म्हणून नोंद झाली आहे. या इमारतींमधील रहिवाशांची आर्थिक परिस्थिती जेमतेम असल्याने नवीन सदनिका खरेदी करणे परवडणारे नाही.

महाविकास आघाडी सरकारने मंजूर केलेल्या एकीकृत विकास नियंत्रण नियमावलीमध्ये अनेक सवलती दिल्या. परंतु, नाशिक शहरात अद्यापही अनेक इमारती सहा ते साडे सात मीटर रुंदीच्या रस्त्यालगत असल्याने या इमारतींचा पुनर्विकास होणे अशक्य आहे. नव्याने मंजूर झालेल्या विकास नियंत्रण नियमावलीत प्रोत्साहनपर एफएसआय पुनर्विकासासाठी मिळत आहे. मुंबईच्या धर्तीवर त्यात वाढ करून एफएसआय वाढवून दिल्यास अरुंद रस्त्यावरील इमारतींच्या पुनर्विकासाचा मार्ग मोकळा होणार आहे.

या माध्यमातून महापालिका व शासनाच्या महसुलातदेखील वाढ होईल. धोकादायक इमारतींचा पुनर्विकास होऊन भविष्यातील दुर्घटना टळेल, या आशयाचे निवेदन नगरविकास मंत्र्यांना सादर करण्यात आले. या विषयावर सकारात्मक भूमिका घेण्याचे आश्‍वासन श्री. शिंदे यांनी देताना प्रस्ताव सादर करण्याच्या सूचना दिल्या, अशी माहिती श्री. बोरस्ते यांनी दिली.