NMC Tree Plantation: पुणे महामार्गावरील रस्त्यातील वृक्षांचे पुनर्रोपण! 24 झाडांच्या बदल्यात 120 नवीन झाडे

NMC Tree Plantation : महामार्गाचे विस्तारीकरण होऊ नये गेल्या अनेक वर्षांपासून रस्त्याचाच असलेल्या नाशिक- पुणे महामार्गावरील द्वारका ते दत्तमंदिर या दरम्यानची मोठे महाकाय वृक्ष हटविण्यास महापालिकेच्या उद्यान विभागाने परवानगी दिली आहे.

मात्र, परवानगी देताना २४ झाडांच्या बदल्यात १२० नवीन झाडे लावणे बंधनकारक राहणार असून २४ पैकी नऊ वृक्षांचे पुनर्रोपण केले जाणार आहे. (Replanting of Road Trees on Pune Highway 120 new trees instead of 24 trees nashik)

द्वारका ते दत्तमंदिर या दरम्यान मोठ्या प्रमाणात वडाचे वृक्ष आहे. महामार्गाचे विस्तारीकरण करताना २०१६ मध्ये वृक्षतोडीचा प्रस्ताव सादर करण्यात आला होता. मात्र, वृक्षप्रेमींनी वृक्षतोडीला मोठा विरोध केला.

तेव्हापासून महामार्गावरील महाकाय वृक्ष रस्त्यांमध्ये आले आहे. रस्त्यामध्ये वृक्षांमुळे मोठ्या प्रमाणात अपघात तर होतातच त्याशिवाय वाहतूक ठप्प होण्याची प्रकारदेखील वारंवार घडतात. वाहनांचे वेगदेखील कमी राहत असल्याने वाहतूक ठप्प होते.

त्या पार्श्वभूमीवर वृक्षांचे पुनर्रोपण करावे, अशी नागरिकांची मागणी होती. त्याअनुषंगाने महापालिकेच्या उद्यान विभागाकडे राज्य महामार्ग प्राधिकरणासह वृक्षप्रेमींनी मागणी केली होती.

रस्त्यातील एकूण वृक्षांपैकी काही धोकादायक वृक्ष तोडण्यास उद्यान विभागाने परवानगी दिली आहे. त्यात २४ वृक्ष तोडण्यास परवानगी दिली असून, ९ वृक्षांचे पुनर्रोपण करण्याचा सूचना दिल्या आहेत.

वृक्ष पुनर्रोपण बंधनकारक

२४ वृक्षांपैकी नऊ पुरातन वृक्षांचे पुनर्रोपण करण्याची अट महापालिकेने घातली आहे. राष्ट्रीय महामार्ग प्राधिकरणाने २४ झाडे तोडण्याची परवानगी मागितली.

२४ झाडे तोडायची असेल तर त्यातील ९ झाडांचे पुनर्रोपण करावे व पुनर्रोपण होणाऱ्या झाडांमध्ये ८ वड व १ मोहाचे झाड लावावे अशा सूचना दिल्या आहेत. तोडल्या जाणाऱ्या १५ वृक्षांमध्ये ९ कडुलिंबाचे, १ सिसम, १ करंज, १ आंबट चिंच, तर १ विलायती चिंचेच्या झाडाचा समावेश आहे.

"वृक्ष तोडण्याऐवजी पुनर्रोपण करणे हा चांगला पर्याय आहे. ९ वृक्षांचे पुनर्रोपण करण्यास परवानगी देण्यात आली असून, १५ झाडे तोडण्यास परवानगी दिली आहे. ९ वृक्षांचे पुनर्रोपण व १२० नवीन झाडे लावण्याची अट घालण्यात आली."

- विवेक भदाणे उद्यान अधीक्षक महापालिका