नाशिक जिल्ह्यातील धरणांमधील साठ्यात एक टक्क्याने वाढ

नाशिक: जिल्ह्यातील मोठ्या सात आणि मध्यम १७ अशा एकूण २४ धरणांमधील साठ्यात एका दिवसात एक टक्क्याने भर पडली. धरणांमध्ये ६४ टक्के साठा झाला आहे. गेल्या वर्षी ७३ टक्के साठा झाला होता. दारणामधून १५०, भावलीतून ७३, वालदेवीमधून १८३, नांदूरमध्यमेश्‍वरमधून ८०७, तर हरणबारीमधून ५२३ क्यूसेक विसर्ग सुरू आहे. आतापर्यंत ४० टक्क्यांच्या आत दोन तालुक्यांत पाऊस झाला आहे.

नाशिक तालुक्यात ३९.८४, तर चांदवडमध्ये ३२.८६ टक्के पाऊस झाला आहे. इतर तालुक्यांतील पावसाची टक्केवारी अशी : इगतपुरी- ७५.७७, दिंडोरी- ५१.२४, पेठ- ७३.६१, त्र्यंबकेश्‍वर- ५९.०५, मालेगाव- ७२.५५, नांदगाव- ७४.२९, कळवण- ५४.७२, बागलाण- ६४.७३, सुरगाणा- ७५.४६, देवळा- ७५.०४, निफाड- ७७.३०, सिन्नर- ४६.५२, येवला- ६६.०५.

पाच धरणे तुडुंब

आळंदी, भावली, वालदेवी, हरणबारी, माणिकपुंज ही धरणे शंभर टक्के भरली आहेत. नाशिक शहराला पाणीपुरवठा करणाऱ्या गंगापूर धरणात ९० टक्के साठा झाला आहे. कश्‍यपीमध्ये ६३, गौतमी गोदावरीमध्ये ७२, पालखेडमध्ये ७६, वाघाडमध्ये ७०, दारणामध्ये ८९, कडवामध्ये ९२, नांदूरमध्यमेश्‍वरमध्ये ९६, चणकापूरमध्ये ७८, केळझरमध्ये ८२, पुनंदमध्ये ८३ टक्के साठा झाला आहे.

कमी साठ्याची धरणे (आकडेवाडी टक्क्यात)

- करंजवण- ३८

- ओझरखेड- ३१

- पुणेगाव- ४६

- तिसगाव- ११

- मुकणे- ५८

- भोजापूर- २१

- नाग्यासाक्या- ११

- गिरणा- ४५