सरकारी यंत्रणेकडूनच ॲम्फोटेरिसिन-बीची जादा दराने विक्री

नाशिक : औषधांवर निश्‍चित केलेल्या किमतीपेक्षा एक रुपया अधिक घेतला तरी खासगी औषध विक्री दुकानदारांवर कारवाई होते. परंतु सरकारी यंत्रणेकडूनच ‘ॲम्फोटेरिसिन बी’(amphotericin-b) इंजेक्शनची जादा दराने विक्री करण्याचा प्रकार समोर आला आहे. यासंदर्भात रुग्णांच्या नातेवाइकांना पैसे परत करण्याची भूमिका जिल्हा रुग्णालयाकडून घेण्यात आल्याने नातेवाइकांचा रोष थंडावला. (Selling amphotericin-B at extra rates from government agencies)

सरकारी यंत्रणाच सूचना पाळत नाही

कोरोनाबाधित रुग्ण(Corona patients) उपचाराअंती बरा झाल्यानंतर आता म्युकरमायकोसिस(Mucormycosis) आजाराला सामोरे जावे लागत आहे. उपचारासाठी ॲम्फोटेरिसिन बी(amphotericin b) इंजेक्शनची आवश्यकता भासते. इंजेक्शनची किंमत अधिक असल्याने सर्वसामान्यांच्या आवाक्याबाहेर आहे. रेमडेसिव्हिर(Remdesivir) इंजेक्शनप्रमाणे काळा बाजार होण्याची शक्यता असल्याने राज्य शासनाने खासगी मेडिकलमध्ये इंजेक्शन विक्रीवर बंदी घातली आहे. सरकारी यंत्रणेमार्फतच इंजेक्शन विक्री करण्याचा निर्णय घेतला आहे. १९ मेस जिल्हा रुग्णालयाला इंजेक्शन प्राप्त झाल्यानंतर अधिकतम छापील किमतीनुसार साधारण साडेसात हजार रुपयांना इंजेक्शन रुग्णांच्या नातेवाइकांना विकले गेले. २० मेस शासनाने इंजेक्शनची किंमत कमी करून साधारण साडेपाच हजार रुपयांना विक्री करण्याच्या सूचना दिल्या. मात्र जिल्हा रुग्णालयाकडून छापील किमतीनुसारच सुमारे साडेसात हजार रुपयांना इंजेक्शनची विक्री करण्यात आली. यामुळे औषधे खरेदी करण्यासाठी रांगेत उभ्या नागरिकांना नव्या त्रासाला सामोरे लागले. खासगी मेडिकलमध्ये छापील किमतीपेक्षा एक रुपया अधिक घेतला तरी कारवाई होते. मात्र जिल्हा रुग्णालयाकडून अधिक रक्कम आकारण्यात आल्याचा प्रकार समोर आला.

''ॲम्फोटेरिसिन बी इंजेक्शनसाठी रोख स्वरूपात रक्कम घेतली जात नाही. जेवढे इंजेक्शन लागतील त्या रकमेचा डिमांड ड्राफ्ट(DD) स्वीकारला जातो. शासनाकडून किंमत कमी होऊन आली, ही बाब खरी असली तरी नवीन डिमांड ड्राफ्ट काढणे यात विलंब होणार असल्याने आहे त्या किमतीचे डीडी स्वीकारले. रुग्णालयाकडे रकमेचा फरक पुन्हा वर्ग केला जाणार आहे.''

-डॉ. अशोक थोरात, जिल्हा शल्यचिकित्सक, जिल्हा रुग्णालय