जनतेसाठी गुंड झाल्याचा अभिमानच - सुधाकर बडगुजर

सिडको (नाशिक) : जुन्या शिवसैनिकांनी नुसता हातात भगवा घेऊन मिरविला नाही तर वेळप्रसंगी झेंड्याचा दांडासुद्धा भ्रष्टाचारी लोकांच्या रक्ताने भगवा केलेला आहे. जुन्या शिवसैनिकांना काही ज्ञानी गुंड म्हणायचे पण जनतेसाठी गुंड झालो याचा अभिमानच आहे. नाहीतर गप्प बसणारे षंढ नाहीत असे आवर्जून सांगावेसे वाटते, असे प्रतिपादन शिवसेना महानगरप्रमुख सुधाकर बडगुजर यांनी केले.

येथील माऊली मंगल कार्यालयात आयोजित जुन्या ज्येष्ठ शिवसैनिकाशी संवाद या कार्यक्रमाप्रसंगी ते बोलत होते. बडगुजर म्हणाले, की जुने शिवसैनिक बोलतात ही त्यांची मर्दुमकी आजच्या घडीला शिवसैनिकांत असायला हवी. त्यावेळेस पक्षाचा नेता खूप काही श्रीमंत नसायचा पण उपाशीपोटी प्रचार करून जुन्या शिवसैनिकांनी शिवसेना गावागावात पसरवली. ही पक्षनिष्ठा आजच्या पिढीच्या शिवसैनिकात असायला हवी. याप्रसंगी मामा ठाकरे, प्रवीण तिदमे, पुंजाराम गामणे, मंदाताई दातीर, सचिन राणे, राकेश दोंदे, राजेंद्र नानकर, कैलास चुंबळे यांनी ही शिवसेना पक्षवाढीसंदर्भात सूचना करत मत मांडले. प्रास्ताविक शिवसेना विधानसभा समन्वयक सुभाष गायधनी यांनी केले. बाळासाहेब दळवी, राजा खांबेकर, योगेश बेलदार, बालम शिरसाट, वसंत पाटील, प्रताप मटाले, नीलेश साळुंके, सुरेश पाटील, दादाजी अहिरे, राजेंद्र वाकसरे, मयूर परदेशी, बबलू सूर्यवंशी, भूषण राणे, अजित काकडे, किरण शिंदे, दादा मेढे, आबा सोनवणे, सतीश खैरनार, संतोष सैंदाणे, राहुल सोनवणे, संदीप चौधरी, शरद दातीर, आबा पाटील, नदेश ढाले, राहुल पाटील, अविनाश काकडे, अमेय जाधव, पी. एस. राजपूत आदी जुने, नवे शिवसेना पदाधिकारी उपस्थित होते.

जुन्या शिवसैनिकांची मोट

शिवसेना महानगरप्रमुख झाल्यानंतर बडगुजर यांनी नाशिक शहरात भगवेमय वातावरण केल्याचे दिसून येते. सुरवातीला युवासेना, युवतीसेना, महिला आघाडी व शाखा उद्‌घाटनाचे कार्यक्रम झाले. त्यानंतर सलग दीड महिना रक्तदान शिबिर घेण्यात आले व आता जुन्या ज्येष्ठ शिवसैनिकांना एकत्र करून त्यांची मोट बांधण्याचे बडगुजर करताना दिसत आहे.