नाशिक : खुनाची रहस्यमय पुस्तके वाचून शिक्षक (Teacher) पतीने चारित्र्याचा संशय घेऊन पत्नीचा गळा चिरून आणि मनगटावर वार करून निर्घृण खून केला.
याप्रकरणी नाशिक जिल्हा व सत्र न्यायालयाने आरोपी शिक्षक पतीला मरेपर्यंत जन्मठेपेची शिक्षा ठोठावली आहे. (Teacher husband sentenced to life imprisonment for wife murder nashik news)
पत्नीचा खुन केल्यानंतर आरोपी पतीने पोलिसांना स्वत:च खबर देत पत्नीचा कोणीतरी खुन केल्याचा बनाव केला होता. सदरील घटना जून २०१७ मध्ये घडली होती. विलास शंकर मोकळ (रा. रो हाऊस, हेरंब कॉलनी, सिन्नर) असे आरोपीचे नाव आहे. संगीता विलास मोकळ असे मयत पत्नीचे नाव आहे.
आरोपी मोकळ हा त्याच्या पत्नीच्या चारित्र्यावर संशय घेत असे. मोकळ हा आई, पत्नी व दोन मुलांसमवेत राहत होता. १९ जून २०१७ रोजी सायंकाळी मुले घराबाहेर खेळायला तर आईही घराबाहेर गेल्याची संधी साधून, आरोपी मोकळ याने पत्नी संगिता हिचा बेडरुममध्ये ब्लेडने गळा चिरला, तसेच तिच्या हाताच्या मनगटाच्या नसा कापल्या.
त्यासाठी त्याने तीन ब्लेड वापरले होते. त्यानंतर तोही घराबाहेर निघून गेला. जरावेळा परत आला असता, त्याने हंबरडा फोडला आणि पत्नीचा खुन झाल्याचा बनाव रचला. स्वत:च त्याने सिन्नर पोलिसांना फोन करून घटनेची माहिती दिली.
हेही वाचा : अल्पमतातील निवाडे आणि सामान्य माणूस
याप्रकरणी सिन्नर पोलिसात मयत संगीता मोकळ यांचा भाऊ जनार्दन खंडीझोड यांच्या फिर्यादीनुसार खुनाचा गुन्हा दाखल करण्यात आला होता. सदरील गुन्ह्याचा तपास सिन्नर पोलीस ठाण्यातील सहायक निरीक्षक सय्यद यांनी कसून तपास केला आणि आरोपी मोकळ यास अटक केली. याप्रकरणी दोषारोपपत्र न्यायालयात सादर केले होते.
सदरील खटला जिल्हा व सत्र न्यायालयाच्या न्या. मृदुला भाटिया यांच्यासमोर चालला. यावेळी सरकार पक्षातर्फे ॲड. सुलभा सांगळे यांनी १५ साक्षीदार तपासले.
यात वैद्यकीय अधिकारी, फॉरेन्सिकचा अहवाल महत्त्वाचा ठरला. परिस्थितीजन्य पुराव्यांच्या आधारे न्या. श्रीमती भाटिया यांनी आरोपी मोकळ यास मरेपर्यंत जन्मठेपेची शिक्षा आणि १० हजार रुपयांचा दंड ठोठावला.
नियोजनबद्ध रचला होता बनाव
आरोपी मोकळ याने पत्नीचा खुन करण्यापूर्वी खुनासंदर्भातील रहस्यमय पुस्तके वाचल्याचे तपासातून समोर आलेले आहे. आरोपी मोकळ याने पत्नी संगीताचा खुन केल्यानंतर गव्हाचे पोते आणण्यासाठी म्हणून घराबाहेर पडला. सिन्नरमधील एका बारमध्ये गेला आणि मुद्दामपणे सीसीटीव्ही कॅमेऱ्यासमोरच बीअर पित बसला.
यावेळी तो सातत्याने सीसीटीव्हीकडे पाहत होता. यावरूनच पोलिसांचा संशय बळावला. तसेच त्याने वापरलेले ब्लेडही पोलिसांना मिळाले. आरोपी मोकळ याने अत्यंत नियोजनबद्धरित्या खुनाचा बनाव रचला परंतु पोलिसांच्या तपासात तो अडकला.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.
