मध्यरात्रीच्या सुमारास चोरट्यांचा धुमाकूळ; सोन्याच्या दागिन्यांवर डल्ला

अंबासन (जि. नाशिक) : मध्यरात्रीच्या सुमारास धाडसी चोरी झाल्याने एकच खळबळ उडाली आहे. चोरट्यांनी सोन्याचे दागिने तसेच पंचवीस हजार रक्कमेवर डल्ला मारला असून पंचक्रोशीत अजून चार ठिकाणी त्याच दिवशी चोरी झाल्याची चर्चा होत आहे. जायखेडा पोलिसांनी घटनास्थळी पहाणी केली असून चोरट्यांचा कसून शोध घेत आहेत.

चोरट्यांचा सोन्यावर डल्ला

जायखेडा पोलिस ठाण्याच्या हद्दीतील द्याने, उत्राणे, खामलोण व नामपूर येथे एकाच रात्री घरफोड्या झाल्याने चोरट्यांनी लाखोंचा ऐवज लंपास केल्याची माहिती समोर येत आहे. यामुळे पोलिसांनी रात्रीच्या बंदोबस्तात वाढ केली असून चोरट्यांचा शोध घेतला जात असल्याची माहिती जायखेडा पोलिसांनी दिली आहे. द्याने येथील भाऊसाहेब भिका कापडणीस यांच्या गावातील घरी आई शांताबाई राहत आहेत. श्रीमती शांताबाई या कामानिमित्त बाहेरगावी गेल्याची संधी साधून चोरट्यांनी कुलूप कोयंडा तोडून घरात प्रवेश केला. घरातील लाकडी कपाटातील तीन तोळ्याच्या पुतळ्या, तीन ग्रॅम कानातील रिंगा, सहा ग्रॅम तोंगल व पंचवीस हजार रोख रक्कम घेऊन चोरट्यांनी पोबारा केला आहे. तसेच निंबाजी कापडणीस यांच्या शेतातील शेतीच्या साहित्यावरही डल्ला मारला आहे.

जायखेडा पोलिसांत याबाबत माहिती मिळताच सहाय्यक पोलिस निरीक्षक श्रीकृष्ण पारधीसह, उपनिरीक्षक तुषार भदाणे घटनास्थळी दाखल होत पाहणी केली. चोरीच्या घटना घडू नयेत यासाठी जायखेडा पोलिसांनी हद्दीतील गावांमध्ये गस्ती वाढविण्यात आली असल्याचे पोलीस प्रशासनाकडून सांगण्यात आले आहे.