तिसऱ्या वर्षीही गणेश मूर्तीकारांचे अर्थकारण शून्यावर

नाशिक रोड (नाशिक): नाशिक शहरातल्या मूर्तीकारांचे अर्थकारण सध्या बिघडले आहे. सलग दोन वर्ष कोरोनामुळे वीस टक्क्यांवर मूर्तीविक्री, सार्वजनिक गणेशोत्सव कार्यक्रमावरील मर्यादा यामुळे मूर्ती व्यवसाय शून्यावर येऊन ठेपला आहे. कोरोनामुळे सार्वजनिक कार्यक्रमांना बंदी असल्यामुळे मोठ्या मूर्ती बनविणे बंद झाले आहे. पर्यायाने व्यवसायातला नफा २० टक्‍क्‍यांहून खाली आला आहे.

सध्या मूर्तिकार धास्तावले आहे. सलग दोन वर्ष कोरोनामुळे घटलेली मूर्तीविक्री आणि सार्वजनिक कार्यक्रमांवर असलेली बंदीमुळे व्यवसायावर मोठा परिणाम झाला आहे. सध्या केवळ दोन फुटापर्यंत मूर्ती बनवण्यासाठी परवानगी आहे. या मूर्ती सध्या घरगुती गणेशोत्सवाला विकल्या जाणार आहेत. सार्वजनिक गणेशोत्सव मंडळांवर सध्या कायदेशीर आणि तांत्रिक अडचणीमुळे टांगती तलवार आहे. अनेक परवानग्या काढाव्या लागल्या. यामुळे अनेक गणेशोत्सव मंडळ सध्या सार्वजनिक ठिकाणी गणेश मूर्ती प्रतिष्ठापना करण्यासाठी धजावत नाही. पर्यायाने मोठ्या मूर्ती विकल्या जात नाही. गेल्या दोन वर्षापासून मूर्तिकारांची उपासमार सुरू आहे. तिसऱ्या वर्षीही या मूर्तिकारांचे अर्थकारण शून्यावर आले आहे. त्यामुळे या मूर्तिकारांना शासनाने अर्थसाहाय्य द्यावे, अशी मागणी होत आहे.

सलग दोन वर्षापासून व्यवसाय ठप्प झाला आहे. नाममात्र खर्चही निघत नाही. याशिवाय तयार केलेल्या मूर्ती सर्वच विकल्या जात नाही. दोन फुटांपर्यंत गणेशमूर्ती तयार करीत आहोत. मोठ्या मूर्तींसाठी मागणी शून्यावर आली आहे. शासनाने मूर्तिकारांना अर्थसाहाय्य करायला हवे.

- सीमा गोपाल भाटी, मूर्तीकार.