देवगाव आश्रमशाळेतील ‘त्या’ शिक्षकाची बदली

नाशिक : देवगाव येथील शासकीय कन्या आश्रमशाळेत वृक्षारोपणावरून उठलेल्या वादळानंतर शाळेतील संबंधित शिक्षकाची प्रशासनाकडून प्रतिनियुक्तीवर दुसऱ्या आश्रमशाळेत बदली करण्यात आली आहे.

स्थानिकांचा रोष शांत करण्याच्या उद्देशाने ही प्रशासकीय बदली करण्यात आल्याचे विभागाकडून सांगण्यात आले. (Transfer of teacher in Devgaon Ashram School for restricting girl student from tree plantation nashik Latest marathi news)

२५ जुलै २०२२ ला देवगाव येथील आश्रमशाळेतील विद्यार्थीनीने आदिवासी अपर आयुक्त यांच्याकडे केलेल्या तक्रारीत मासिक पाळी आली असल्याचे कारणातून शिक्षकांनी वृक्षारोपण करण्यास मनाई केल्याचा आरोप केला होता.

त्याची आदिवासी आयुक्तांनी दखल घेत प्रकल्प अधिकारींना चौकशीअंती अहवाल सादर करण्याचे आदेश दिले होते. राज्य महिला आयोगाकडून देखील या प्रकरणी चौकशी करून कारवाई करण्याचे निर्देश देखील देण्यात आले.

प्रकल्प अधिकारी वर्षा मीना यांनी चौकशी करत या प्रकरणाचा अहवाल वरिष्ठांना सादर केला. त्यानंतर या विद्यार्थीनींची ही तक्रार खोटी असल्याचे पुढे आले होते. दरम्यान या प्रकारामुळे स्थानिकांमध्ये रोष होता.

संबंधित विद्यार्थिनी ही त्याच शाळेत शिक्षण पूर्ण करणार आहे. भविष्यात पुन्हा कुठलीही अडचण येऊ नये म्हणून विभागाकडून त्या शिक्षकांची देवगाव येथून म्हैसगण येथील शासकीय आश्रमशाळेवर प्रतिनियुक्तीने बदली करण्यात आली आहे.