नाशिक : सार्वजनिक ठिकाणी थुंकणाऱ्या २४८ जणांकडून अडीच लाख वसूल

नाशिक : स्वच्छ शहराच्या स्पर्धेत नाशिक (nashik) शहराचा पहिला क्रमांक येण्यासाठी ऑनलाइन स्पर्धेत सहभागाची गती वाढत असताना सार्वजनिक ठिकाणी थुंकणाऱ्या २४८ जणांवर महापालिकेकडून कारवाई करण्यात आली.

स्वच्छ शहरांमध्ये वरच्या नंबरला आणण्यासाठी महापलिकेसह शहरातील सामाजिक संस्था, राजकीय पदाधिकारी सक्रिय झाले आहे. असे असताना महापालिकेने शिस्त लावण्यासाठी कंबर कसली आहे. महापालिकेतर्फे सुरू असलेल्या प्रयत्नांना गालबोट लावणाऱ्या बेशिस्त नागरिकांवर महापालिकेने कारवाया सुरू केल्या आहेत. काही महिन्यांमध्ये नाशिक महापालिकेकडून सार्वजनिक ठिकाणी थुंकणाऱ्या २४८ जणांवर कारवाई करून अडीच लाखाचा दंड वसूल केला आहे.

स्वच्छ सर्वेक्षणासाठी केंद्राचे पथकदेखील नाशिकला (nashik) येऊन गेले. सध्या त्याला फीडबॅक देण्याचे काम सुरू असले तरी काही विशिष्ट नागरिक नाशिकला स्वच्छ व सुंदर बनविण्याच्या कामात खोडा निर्माण करीत आहे. याचाच एक भाग म्हणून नको त्या ठिकाणी थुंकणाऱ्या व घाण करणाऱ्या नागरिकांवर महापालिकेकडून आता कारवाई सुरू करण्यात आली आहे. गत काही काळामध्ये २४८ जणांवर महापालिकेने (nmc) कारवाया करीत अडीच लाख रुपयांचा दंड वसूल केला. घनकचरा संचालक डॉ. आवेश पलोड यांनी ही माहिती दिली.