बारामतीकडे रवाना होणार बेरोजगारांची वारी

नाशिक रोड : नेट- सेट, पीएच. डी पदवी प्राप्त उच्चशिक्षित बेरोजगारांची वारी १३ एप्रिलपासून पुण्यातील उच्च शिक्षण कार्यालयापासून बारामतीकडे रवाना होणार आहे. एक हजारावर प्राध्यापक सहभागी होणार आहेत. बारामतीत राष्ट्रवादी काँग्रेसचे अध्यक्ष शरद पवार (NCP President Sharad Pawar) यांची भेट घेऊन निवेदन दिले जाणार आहेत.

राज्यातील अशासकीय अनुदानित महाविद्यालये आणि अकृषिक विद्यापीठांमध्ये रिक्त सहाय्यक प्राध्यापकांच्या पदांची शंभर टक्के भरती करावी, तासिका धोरण बंद करून माने समितीचा अहवाल लागू करावा आदी मागण्यांसाठी नेट- सेट, पीएच. डीधारक संघर्ष समितीने उच्चशिक्षितांची वारी बारामतीच्या दारी या सत्याग्रहाचे आयोजन केले आहे. प्राध्यापकांची पदे वित्तीय अडचणी, आरक्षणाचे प्रश्न व प्रशासकीय हलगर्जीपणामुळे बारा वर्षांपासून भरलेली नाहीत. उच्च शिक्षणावरील शासकीय खर्चाबाबत कॅगने ताशेरे ओढले आहेत.