Unseasonal Rain Damage : गारपीट, अवकाळीने द्राक्ष सडण्यास सुरवात; शेतकरी चिंतेत

Unseasonal Rain : द्राक्षाची पंढरी म्हणून ओळखल्या जाणाऱ्या नाशिकच्या निफाड तालुक्यातील गावांना गत रविवारी सायंकाळी गारपीट आणि अवकाळी पावसाने चांगलेच झोडपून काढल्याने त्याचे परिणाम आता शेती पिकांवर दिसण्यास सुरवात झाली आहे.

द्राक्ष बागेतील उभ्या पिकावरील द्राक्ष सडण्यास सुरवात झाल्याने द्राक्ष उत्पादकांच्या चिंतेत वाढ झाली. (Unseasonal Rain Damage Hail unseasonal start of grape rot Farmers worried nashik news)

निफाड तालुक्यातील टाकळी विंचूर, सायखेडा चांदोरी, शिंगवे, मौजे सुकेणे, कसबे सुकेणे, निफाड, उगाव, वनसगाव, सारोळे, खडक माळेगाव या गावांना सलग तीन-चार दिवस वादळी वाऱ्यासह अवकाळी पावसाने झोडपून काढल्याने शेती पिकांचे मोठे नुकसान झाले.

सर्वाधिक फटका द्राक्ष पिकाला बसला आहे. टाकळी विंचूर येथील गोविंद टोपे या द्राक्ष उत्पादक शेतकऱ्यांने तीन एकरावर द्राक्षाची लागवड केली असून आठ ते नऊ लाख रुपये खर्च करून द्राक्षाचे पीक जोमदार घेतले होते.

व्यापाऱ्यांशी पन्नास रुपये दराने व्यवहार झाला. सोमवारपासून द्राक्ष काढणीचा हंगाम सुरू होण्याअगोदरच रविवारी सायंकाळी गारपीट अवकाळी पावसाने झोडपून काढल्याने द्राक्ष बागेचे मोठे नुकसान झाले.

हेही वाचा : सामान्यांचा पैसा सुरक्षित ठेवण्यासाठीच Virtual Currency करकक्षेत

उभ्या द्राक्ष बागेवरील पिकांना तडे गेल्याने द्राक्ष सडण्यास सुरवात झाली आहे. द्राक्षांवर चाचण देखील बसत असल्याने परिसरातील नागरिकांचे आरोग्य धोक्यात आले आहे. द्राक्ष काढून फेकण्यासाठीही पैसा शिल्लक नाही बँकेचे घेतलेले कर्ज, कुटुंबाचा उदरनिर्वाह कसा करावा मोठा प्रश्न उभा राहिल्याचे श्री. टोपे चिंतेत आहे.

"अवकाळी पावसाने द्राक्ष सडण्यास सुरवात झाल्याने द्राक्ष काढून फेकण्यासाठीही पैसा शिल्लक नाही. बँकेचे घेतलेले कर्ज, कुटुंबाचा उदरनिर्वाह कसा करावा, पुढील पीक कसे घ्यावे यासह अनेक प्रश्न डोळ्यासमोर उभे राहिल्याने संपूर्ण कर्जमाफी करत पुढील पिकांसाठी शेतकऱ्यांना प्रत्येकी एक लाख रुपये रोख मदत करावी."

-शिवम हांडोरे, द्राक्ष उत्पादक शेतकरी