महापारेषण कंपनीत नोकरभरतीचा मार्ग मोकळा

नाशिक : राज्य वीज मंडळाच्या विभाजनानंतर तयार झालेल्या महापारेषण (mahapareshan) कंपनीतील वर्ग ‘एक’ व ‘चार’ प्रवर्गातील आकृतिबंधात पदोन्नतीतील असमानता दूर करण्यासाठी महाराष्ट्र स्टेट इलेक्ट्रिसिटी वर्कर्स फेडरेशनच्या (Maharashtra State Electricity Workers Federation) पाठपुराव्याला यश आले. ऊर्जामंत्री व सूत्रधारी कंपनीचे अध्यक्ष डॉ. नितीन राऊत यांच्या अध्यक्षतेखाली सूत्रधारी कंपनी संचालक मंडळाची बैठक होऊन त्यात महापारेषण कंपनीच्या नवीन आकृतिबंधास मान्यता देण्यात आली. (way of recruitment in mahapareshan company is cleared out)

चार हजार तंत्रज्ञ भरतीचा मार्ग मोकळा

महापारेषण कंपनीच्या एचआर विभागाने नवीन आकृतिबंध लागू करण्याच्या अनुषंगाने १५ जूनला प्रशासकीय परिपत्रक क्रमांक ३३३६ जारी केले. नव्या आकृतिबंधामुळे साधारण चार हजार तंत्रज्ञ भरतीचा मार्ग मोकळा झाला. वीज कंपनीच्या विभाजनानंतर वर्कर्स फेडरेशनकडून २००७ पासून या विषयावर पाठपुरावा सुरू होता. २०१७ मध्ये सुधारित आकृतिबंध लागू करण्याची प्रक्रिया सुरू केली होती. काही कामगार संघटनांनी कॕटेगरीचा मुद्दा उपस्थित केला. यामुळे अंमलबजावणी रखडली. नंतर महापारेषण प्रशासनाने त्रयस्थ सचिव के. पी. बक्षी यांच्या समितीची स्थापना केली. बक्षी समितीने महापारेषण कंपनी व्यवस्थापनास अहवाल सादर केला.

नवीन आकृतिबंध लागू करावा, या मागणीसाठी प्रकाशगंगा मुख्य कार्यालयासमोर वर्कर्स फेडरेशनने बेमुदत आंदोलन केल्यानंतर ऊर्जा विभागाच्या प्रधान सचिवांसमवेत संघटनेच्या पदाधिकाऱ्यांची बैठक होऊन ऊर्जा सचिवांनी महापारेषण कंपनी संचालकांची मान्यता घेऊन राज्य सरकारच्या ऊर्जा विभागास मान्यतेसाठी पूर्ण सुधारणेसह एप्रिल २०२१ मध्ये प्रस्ताव मांडला. आकृतिबंध मंजूर होऊन लागू करण्याची प्रक्रिया सुरू केल्याने लवकरच प्रलंबित चार हजार ५०० तंत्रज्ञ-चारच्या पदोन्नतीचा मार्ग मोकळा झाला असून, लवकरच पदभरती सुरू होणार आहे. यंत्रचालक प्रवर्गातील कामगारांच्या कामात कोणताही बदल करण्यात येणार नाही. तंत्रज्ञ-चार पदोन्नतीनंतर वर्ग तीनमध्ये जाणार आहे.